Premier League hmahruaitu Arsenal in champion inchuh a intlansiaknaah point an hloh nawn leh a. Table mawngphah a awm Southampton nen 3-3 in an inhnehtawk.
Gunners hi Liverpool leh West Ham United te laka an goal hnih khung an hum zawh loh ve ve hnuah an mual Emirates Stadium-ah an chesual teuh viau a. Huntawp dawnah goal hnih khungin point khat an hmu hram.
A hnung a phui lo
League season kallai a hun pawimawh lai takah Arsenal in panna an nei. An tlarhnung a phui lo leh thin.
Liverpool chu first half-ah nghaisa mahse second half-ah tlawm lek lek zawk an ni a. West Ham United pawhin an beih let chiam ngam avangin a rah an hmu.
Saints lakah an mualpho teuh. Second 28-naah goal an khung nghal a, Aaron Ramsdale tihsual zarah Carlos Alcaraz chuan goal a khung.
Tun season a Premier League goal rang ber pahnih hi Arsenal goal a lut a ni.
Theo Walcott-a’n minute 14-naah a club hlui lakah goal a khung belh a. Minute ruk hnuah Gabriel Martinelli chuan tun season a a goal 15-na a khung.
Duje Caleta-Car-a’n second half-ah Saints goal thumna a khung a. Point thum hlu tak an hmu dawn niin a lang hman.
Mahse Arsenal in minute 88-naah leh 90-naah Martin Odegaard leh Bukayo Saka te hmangin goal an khung a. An mualpho thui tur an veng.
Arsenal manager Mikel Arteta chuan, “Football-ah chuan tihsual neih a awm thei a, chetsual theih lai a awm ve thin. Inrintawk loh lam a ni lo.”
“Mahse khatianga tihsual a awm chuan player-te an tim duh a, vawiinah erawh player hlauthawng chunga khel pakhatmah ka hmu lo. Kha kha 3-1 atanga 3-3 a nih leh theihna kha a ni. Goal chhuah ho tak kha kan tuar.” tiin inkhel zawhhah a sawi.