- Zirsangkima
In nih ve tho ka ring—Scorpions hla, “Wind of Change” hla tìra, “I follow the Moskva down to Gorky Park” tih sa sual nasa vetu kha! Eng ti tiha “German Goalkeeper” ti tel teh tlat thìn nge maw kan nih le!? Kan thiam loh dàn kha a tûnlai lo thìn ngei mai!
Ka Song Book Hlui Kha!
Hman ní chu, ka lehkhabu dah khâwmna ka chin felna lamah hmäna ka Song Book kha ka hai chhuak hlawl mai a—kum 30 chuang liamtaa mi a nih avàngin ka hlut viau mai. Tin, ’92 kuma ka diary pawh ka hai chhuak tel bawk a—ka làwm viau a ni.
Chû ka Song Book hmuh chhuah phêk hnung lamah chuan, ka kutziak ni miah lo, ka farnute kuthnu ni ngei tùr hi a chuang a. 95/96 chhoa Westlife an ngaih sàn hun lai kha ni ngei tùr a ni. Heti hian an lo ziak pek a:
“I always look back, assa work away,
Memo-ries will last, for enterily
And no no virgin!”
(A dik tak chu: “I’ll always look back / As I walk away / Memory will last, for eternity/ And all of our tears” tih a ni daih!)
Ka nuih tiah tiah a; mahse, nuih tùr bîk ka nih lohzia chu ka Song Book chhar chhuah chuan min hriattír chiang mai!
Tape Deck Neih Hma
Tape deck tha tak tak—Phillips siam te, Sony siam te, Aiwa siamte chhuah hma—khatia National Panasonic—rewind leh forward leh ‘Aw thunna’ (record) support kan neih phâk laia kan hla ngaihthlâk thin leh, an zai ngaithla paha rewind pah zêla a hla thu (lyrics) la thlaa kan lo ziah chhàwn ve thin dàn te kha—kan turu viau bîk lo!
A dik chiah lo tih inhre mah ila, kan zak ngai chuang lo a—kan la intithei zâwk mah a!
Inla confi’ tâwkin, Jon Bon Jovi “Dyin’ Much Of A Livin” te kha, kan lo “Daining Machu Buliving” ve chiam zêl a! Thianpa Zára (of Sialsuk) te pawh an bäng chuang lo; Bonnie Tyler hla hit, “Its a Heartache” te pawh an lo “I Cha Nare!” pui ve tho! Mizo zàia hma hruaitu Awithangpa chhuahna khua Sialsûk khaw chhuak ve tho, thianpa Darrokima te Song Book phei chu keusak ngat phei ila, pen tui sen hian ka thai khat tuar ngei ang!
Recording Studio
Kan hun lai te kha chuan, han ti ve leh zêl ila—Lal Thana, kan vénga tape recorder nei hmasa berte in kha kan Recording studio hmasa ber kha a ni a! Duh leh âw kan thun a (voice record); duh leh hla thu kan là a; mahse, a neitu a ni bawk a—intithu thei tak chu a ni!
Pe-lei (play) kan han hmet a. Lal Thana’n note bû leh pen a lo inring. Hustler dàwr atanga in-con’-a kan cassette lei thar Magnasound chhuak ngei, Guns N’ Roses cassette-a mi, “Go Go Vem-ba rên” (November Rain) awmna kan ziah dàn te kha aw … Axl Rose leh Slash te khân rawn hria se chuan, vuak zal hrep tùr zia rêng kan ni—a dik lo baksak thei êm mai! “I cha Go Go Vemba rain” kan tih atang ringawt pawh khan—hlap tham kan tling sa!
G N’ R sawi tâkah chuan, Axl Rose kan ngaih sànna chhan ber chu “Don’t Cry!” tàwpa a thlûp rei uchuak theih vàng kha a ni pakhat. Keini’n, zawm chawp/belh (extended play) a ni tih hre ve tawh hek lo ì—kan inthlûk-chen-rei-siak ta thìn a! A “Ai ai ai…” lai kha, tù ma’n kan thlûkpui pha ngai lo! Hahthlâk duh thìn tak a ni.
Bon Jovi Zùn
G N’ R ngaih sàn hnu deuhah Bon Jovi kan han ngai sáng leh a. ’93 March ni 2-ah ti hian ka Song Book-ah ka lo ziak a: a thupuiah “I Wanna Lay” tiin! A hla thu thenkhat chauh (ka mualpho lutuk loh nán):
“I wana lay you down in a bed of roses
For tonight I’ll sleep on a bed of rails
Oh I wanna be Jesus close as the rose is roses
And lay you down, on a bed of roses.”
(A dik tak: I want to lay you down in a bed of roses
For tonight I’ll sleep on a bed of nails
Oh I want to be just as close as the Holy Ghost is
And lay you down, on a bed of roses)
Khatia an rawn “Bed of Roses” hnu khán Bon Jovi zùnah kan han uai chhunzawm a. A hla hluite kan hai a. Khatih lai kha chuan Original cassette kan tih ang kha, Aizawlah pawh Purple leh Hustler-ah bâk lei tùr kan hmu mang mang ngai lo a nia! Chutah, kan duh ang kha an neih loha leh, an hralh zo tawh a lo ni zêl thìn a. Tum khat chu, Lal Thana bawk hian cassette thar a rawn lei hlawl! Bon Jovi te, Skid Row, Poison, Kiss tihteho awm khâwmna cassette a lo ni! Kan thianzaho làwma làwmzia mai chu—champion làwm ang chiah kan ni!
Ngaihthlâk satliah kan kham lo!
Lal Thana te National Panasonic tape chu kan han pe-lei a; a va nghahhlelhawm êm! An tape chu máwi kan va ti êm! Awtin kan va duh ve êm!
A ngai ang bawkin Lal Thana chu ka Song Book-a hla thu ziak tùr chuan a inring leh ta ràn mai. Skid Row an rawn zai hmasa ber a. “18 and Life” an rawn sa. MTV-a kan lo hmél hriat thuak tawh an ni. Ti hian a hla thu chu a ziak thla a: a thunawn chauh aw…
“18 and lie, you now it
18 and lie, you go
Your time is time and each
18 and life to raw…”
(A dik: “18 and life, you got it
18 and life, you know
Your crime is time and it’s
18 and life to go”)
Kan lo va che sual nasa thìn tak! Mahse, kan zak lo!
A hnuah Poison an rawn zai leh. Song Book-a minute (lyrics) ziaktu-cum-tape-neitu Lal Thana bawk chuan hla thu ziah chu a chuh leh! Tape neitu a nih avàngin tú tana han chuhpui ngam chi rual a ni lo. Poison-ho chuan “Every Rose…” kha an rawn sa. Heti hian a ziak a:
Every horse has its own
Just like every night has its own
Just like every cowboy sings his sad, saddle songs
Every rose has its own
Yeah it does…
Kan pawmpui vek! Lal Thana kha ziak thiam, hla thu la thiam, sap tawng pawh thiam—Pi Kimi Sikula kal zing rau rauah pawh English-a kan tluk ngai loh—mark 100-a mark 12 hmu thei a ni miau a—han ngaih sàn lohna tùr chi zia záng ni hek suh!
Nazareth te kha kan ngaihthlâk nasat an ni; an hla lah kan hria (kan hria ka tih hian an phuah dàn a mil kher lo ang!) Tin, rock music-a tui laklawh kha a awm ve bawk a; Cinderella te kha kan ngaithla nasa ve—an “Heartbreak Station” te phei kha chu … nasa takin kan lo heartbreak-pui ve! An phuah dàn leh kan sak dàn erawn a inang lo a ni mai a!
“Waiting at the station…” kan han ti vang vang a … a bâk kha chu a phuahtu huat thu sawina lam hlîr a ni tawh thìn.
Tin, Slow rock-ah pawh khán kan tui tel tho, “Zai-in zai nawn; demon-straight from the heart” tihte kha a satu Bryan Adams ai maha chiang maha chiangin, thinlung takin kan sa chhuak ve thìn. Chûngte chu a fiah nán ka Song Book-ah a chuang kîlh kêlh vek mai! Tûn hnua a hla thu dik:
You know I’ll never go – as long as I know
It’s comin’ straight from the heart tih te nèn hi chuan a lo inpersan nasa fé mai!
Anni leh Keini!
Mahse, khâng hun lai khán, kan hla thu hriat dàn zahpui hauh loin, hla thu hre bîk anga awmin, thian kawm bîkte tape recorder atanga hla thu la pha bîk niin, intithei deuhin khaw lai kan lèng thìn. A hla thu dik chiah lo mah se, a thu hretu kan ni kha kan intihtheihna ber a ni ve thìn.
Vawiinah erawh ni thar a chhuak a, khaw thar kan hmu ta! Kan tû leh fate lah “OK” leh “Cancel” thiam sa-in an rawn piang emaw tih mai tùr an ni a; an duh hun hunah an Spotify a; an duh khawp loh leh an YouTube thùl! Hla pawh hlut hman lo khawpin a thar a chhuak zung zung a; fans an thlâk zung zung a, a thing thuai thuai bawk. Keini’n band pakhat pawh thangkhat lian chuang kan buaipui thìn a ni a! Kan hun laia (ti ve khanglang ila) Guns N Roses te, Nazareth te, The Beatles leh the Eagles te han làr reizia te kha aw… Khatiang kha an chèn ve hman ta lo—thuai thuai khawvêl-ah Social media hian a hruai lût ta si a!
Song book pawh mamawh tawh loin an YouTube/Spotify ta zêl a. Thil hi an ti hlu tawh lo tih an inhre chuang dèr mai si lo a! Khatia tape recorder, rewind leh forward bâka Pause chauh chhawm chi kha keini chuan kan chawm a, kan háwp a, a tui háng leh a kawchhúng belhbawmin kan ei thìn kha a ni ngai a!
Tûnah erawh zawng, khawvêl a danglam ta! Chutianga belhbawm tuma chêt lâk chu thil âtthlâk a lo ni ta. Web-in engkim a lo hria ni mai loin a lo kawl vek tawh a. Chûng chu kutzungchal hmang chauh paw’n a hmeh chhuah theih ta! Chu chu kan tu leh fate khawvêl a ni.
Hriat thiampui an ngai a; chutih rual chuan enpui thìam pawh a a tül. An IG-na lamah hian tunge an belha tunge an kawm tih te pawh hriatpui an ngai ta. Ngaih tha taka thlah hi kan tih zalènna a nih rualin zalènna hmang thiam loa kan siamna a ni thei tih hi i inhria ang u.
Hmäna Song Book kan hlut tluk khán kan tu leh fate hian phone an hlut ta! Hla thu ziah sual ai chuan emoji dah sual pawi an ti tawh zâwk! Khawvêl hi a danglam ta—a thang zêl miau a! Chutih rual chuan, keini nu leh pa rilru pawh, a thara awmin, lo danglam ve zêl se la. Fate tuipui ang tuipui thei tùrin intuai thar zêl ila—a zawng a zà chuan a theih loh ang; mahse, ‘Eng nge a tih?/Eng nge a en? / Eng nge a tuipui?’ tih tal hi chu hriatpui ve kan bá a ni. Hmänah pawh Song book kan buaipui peih khawp kha maw le!