Sudan khawpui, Khartoum-ah chuan civil mite insasengna hun atan inkahhai puan ni mah se thlawhna hmanga inkahna a thleng reng.
Army chuan an beih mek,Rapid Support Forces (RSF) um chhuah vek tumin khawpui chu an kap tih an sawi.
Inkahna hi nasa hle mah se ni thum dang inkahhai chu pawh sei tura tih mek a ni.
Indonaah hian mi 500 chuang thi an awm tawh a, a tak takah erawh hei aia tam daih an nih rin a ni a. Khartoum-ah hian che thei lovin mi maktaduai tel an tang mek.
Army commander Gen Abdel Fattah al-Burhan leh Hemedti tia hriat lar, RSF chief Gen Mohamed Hamdan Dagalo te inkara inrem lohna hi thuneihna inchuh a ni ber a, RSF mite army-a ziah luh vek tumna awmah an inrem lo bawk.
General-te hian an thenawm ramte bakah US, UK leh UN inrawlhnaa inkahhai puan an remti a. Hei hi pawh sei tum a ni a; mahse, awmzia a awm lem lo.
Army chuan US leh Saudi Arabia aiawha dawrtute kaltlanga inrintawnna an siam chuan engnge a thlen dawn tih hriat theih a nih lohthu an sawi.
Sudanese sumdawng, philanthropist ni bawk, Mo Ibrahim chuan an ram chu tual chhung indona ram a nih mek thu a sawi a, buaina hi an ram chhung chauh ni lovin, an chhehvelah nghawng a nei zel dawn niin an sawi.
“Syria anga awm kan duh lo,” tiin BBC hnenah a sawi a, a tu mah mah hnehna chang awm si lova buai reng an duh lo tih a sawi.
Inbeihna hi Khartoum hmar lamah a ni deuh nia sawi a ni a, heng lai hi Blue & White Niles hnaih a ni a; mahse, khawpui hmun hrang hrangah pawh inbeihna hmun a awm reng tho va, mipui tan chhuah nge ina awm him zawk tih pawh hriat a har hle niin BBC chuan a tar lang.
Army tan hian Khartoum atanga RSF um chhuah vek a harsa dawn nia ngaih a ni a, hmanrua chu nei tha zawk mah se paramilitary-te hi an che rang a, khawpuia inbeihnaa che tura zirtir an nih zawk bawk avangin an thiam hle nia sawi a ni.
Pathiannia inkahhai puan pawh sei a nih thu puan a nih hma khan army hian khawpui hmar lam lailia RSF sipai awmte luhchilhin beihpui an thlak tih an sawi.