Aizawl : MNF party Adviser, Minority Affairs Minister ni bawk Robert Romawia Royte-in “MNF leh India sorkar inremna thuthlungah Mizorama minority te hmasawnna ngaihtuah chu MNF duh anga ziahlan a ni” a ti a. Zoramthanga kaihhruai sorkarin kum 4 chhungin ADC huam chhungah hmasawnna hna ropui tak a thawk nia sawiin, hei hi MNF election manifesto 2018 tihhlawhtlinna a nih thu a sawi.
Lawngtlai East biala MNF North leh South block joint conference, Sangau-III Community hall-a neih a hmanpuinaah he thu hi kar kalta khan Robert Romawia Royte chuan a sawi a. MLA inthlan lo awm turah 6th schedule area-a MLA bial 5-ah MNF tan tlin theihna chance a sang hle nia sawiin, heng bial 5 te lak vek tura tan la turin kalkhawmte chu a chah.
Sports Minister ni bawk Robert Romawia chuan Lawngtlai district hmasawnna turin a department kaltlangin Rs. nuai 13,000 chuangin hna a thawk ve niin a sawi bawk.
Lawngtlai East bial MNF North leh South block joint conference hi bialtu MLA H. Biakzaua pawhin telpuiin, thu a sawi bawk a ni.