Napoli in kum 33 chhunga an Serie A title lak hmasak ber ni tur chu an la nghah leh hlek a ngai. Salernitana hmachhawnin hnehna chang se Italy champion thar ni tur an ni a, nimahsela 1-1 in an inhnehtawk.
Pathianni zana Stadio Diego Armando Maradona-ah Luciano Spalletti pawlte hian minute 62-naah goal an khung a. Mathias Olivera chuan corner atanga a ball hmuh a tauh lut.
Napoli in champion an hnaih hman viau, nimahsela huntawp hma minute ruk a la awmin Boulaye Dia chuan a ke veilamin an si phurh a sut.
Napoli fans ten thawm tha tak nen champion lawm tumin khelmual pan mahse huntiam an la thleng lo. Stadium chhunga an boruak erawh a ropui hle.
Spalletti chuan, “Player ten kan fans te hmaah ngei an tihlawhtling thei lo hi pawi an ti a, zaninah kan fans ten an phu thlawt.”
“Kan fans te suangtuahna leh beiseina hi kan chungah a awm, chuvangin hengte hi a tak ram kan hlen hi an laka kan bat a ni.” a ti a.
“Mahse hlawhtlin mai hi a awlsam lova, hetiang inkhel hi hnehna chan harsatna tak a ni thin tih kan lo hmu fo tawh” tiin a sawi.
Inkhel dangah Juventus in Bologna an hneh theih loh avangin pahnihna nih theihna hun an hloh.