Tottenham in ‘Tottenham’ zia an chhuah. Liverpool nen inkhelin an hmaah an tlu sawp hma hle a, mahse second half-ah beiletin inkhel hmuhnawmah huntawp dawnah Reds in 4-3 in hnehna an chang hram.
Anfield-ah Liverpool in anni ang thova European football khelhphak tum club an mikhual a. A tir minute 15 chhungin goal thum an khung.
Zia a chhuak e!
Spurs hi Newcastle United nen an inkhelh tumin minute 20 chhungin goal nga an chhuah tawh. Hemi hnu lama an inkhel hovah chuan goal chhuah an awlsam hle tih a lang fo.
Curtis Jones chuan minute thumnaah Trent Alexander-Arnold-a cross atangin goal hmahruai a khung. Minute hnih hnu lekah khup hliam zai avanga October thla hnua a vawikhatna atana inkhel bul tan Luis Diaz chuan an goal hnihna Mohamed Salah ball siamsak atangin a khung.
Minute 15-naah Cody Gakpo laka fimkhur lo taka che Cristian Romero chuan penalty a chawi a. Bournemouth leh Arsenal laka khung lo tawh Salah chu chiang takin goal-ah a khung.
English striker Harry Kane chuan halftime hma in goal a khung ve a, Premier League a goal khung tam ber dawttu ni turin Wayne Rooney record a tluk.
Manager an ban hnuah enkawl lailawktu pawh thlak leh tawh an ni a, Spurs hi tunhnaiah an buai. Nimahsela Manchester United nen an inkhelh tumin second half-ah an insiamtha thei. Chu chuan beiseina a siam.
Second half-ah Son Heung-min leh Cristian Romero ten goal ban an pet per hnuah minute 77-naah South Korean forward in goal khat a khung.
Minute 93-naah Brazilian forward Richarlison-a’n an si phurh a sut zova, an lawm hman viau. Mahse an lawm rei lo, Liverpool in Diogo Jota hmangin chakna goal an khung a. Hnehna an chan avangin a sang pali a tel an la inbeisei ngam.
Inkhel zawh lam
Liverpool manager Jurgen Klopp chuan, “Bul kan tan dan a tha tak zet. Kawng tam takah thil tha ka hmu. Kan kheltha a, kan taima tawk a, kan inven dan pawh a tha. Insiamthat kan mamawh hnu pawha kan thawh leh dan pawh a tha hle.” tiin a team a fak.
“Champions League lam chu kan ngaihtuah lo. United leh Newcastle te an chak vek chuan kan tan beisei tur a awm lo. An tlawm zel chuan kan inhnaih ve thei ang. Hei vang hian Europe a inel hrim hrim turin theihtawp kan chhuah zel hi a pawimawh.” tiin season thar lam a thlir.
Inkhel dang
Premier League champion lai Manchester City in league hmahruaitu ni turin 2-1 in Fulham an hneh.
Craven Cottage-ah City tan hian Erling Haaland chuan minute 3-naah penalty atangin goal a khung a. Fulham in Carlos Vinicius hmangin sut mahse Julian Alvarez chuan an chakna goal a khung.
Norwegian striker Haaland hian inelna hrang hrangah tun season-ah goal 50 a khung tawh.
Manchester United in Bruno Fernandes-a goal hmangin 1-0 in Aston Villa an hneh a. Unai Emery-a’n Villa a enkawl hnua an lama goal khung thei hmasa ber an ni.