Assam Rifles hotu ten tuna an awmna hmun atangin Zokhawsang-ah insawn dawn mahse, an insawn hun tur erawh an la sawi theih loh thu an sawi.
Vawiina media conclave an buatsaihah he thu hi AR hotute chuan an sawi a. Aizawl atanga an hmunpui thar tur Zokhawsanga insawn turin Mizoram sorkar nen inremna ziahfel a nih tur thu sawiin, an insawn hun tur erawh an sawi theih rih loh thu leh order an hmuh veleh an insawn tur thu an sawi a. Tunah chuan Zokhawsanga an hmun thar turah tihfel tur a la tam niin an sawi.
AR hotute chuan kum 2021-22 leh 2022-23 chhunga an hmalakna tlangpui te sawiin, project hrang hrang 24 an thawh thu an sawi a. Mizoram hmun hrang hrangah national integration tour, sports meet, career guidance- counseling, free medical camp, hmeichhiate chawikanna lam programme, infrastructure development leh vocational training te civil mite tan an buatsaih thu an sawi.
Sorkar kum kal mek atan kawng hrang hranga – thalaite, hmeichhia leh naupangte hmasawnna leh chawikanna tur ruahmanna an siam thu sawiin, conclave leh national integration tour bakah kawng hrang hranga hmachhawp an neih thu AR hotute chuan an sawi a. Damdawi hman sual chungchangte, dan lova ram chhunga lutru chungchanga media te mawhphurhna te, Zokhawsanga Assam Rifles sawn chungchangte kalkhawm ten an sawiho bawk.