Chinese pa pakhat chuan Tibetan khualbuka a khum hnuaia ruang a hmuh chhuah chu tualthahna ngei nia ngaia chhui a nih hnuah a thattu nia rinhlelh pawh man a ni.
He pa hian April 21-a khualbuk pindan a luhin rim danglam tak a hria a, pindan danga luh leh chuan darkar thum zet a lo mut tawhna khum hnuaiah chuan ruang chhe tawh tak a lo awm reng tawh a ni.
Hemi zan vek hian police chuan he thihna nena inhnamhnawih nia hriat mi pakhat an man zui a ni.
Tual chhung chanchinbuten Zhang ti chauhva an tar lan hian Shangyou News hnenah a tukah Lhasa a chhuahsan nghal tih a sawi bawk.
Warm light mawi taka chei leh thingzaia sak balcony mawi tak nei, Guzang Shuhua Inn-a Zhang-a thlenna hi khualbuk hriat hlawh, social media-ah pawh tam leh a tlawhtuten thla an lak nasat a ni.
Zhang-a hian a thil tawn hi online pawhin a post a; mahse, mi pakhatin social media-a April 28-a screengrab a thehdarh hnuah hriat a hlawh chauh va. Khualbuk pawhin he thil hi chhangin a dik loh thu pawh an sawi.
Zhang-a hian Weibo-ah pawh tar lang lehin khualbukah hian a thleng ngei tih lanna receipt a tilang tel a. Hei hian tual chhung chanchinbute kovin an be ta sup sup a ni.
April 30-a Shangyou News-in an kawm tum chuan, “Ka hlau tak zet a, tun thlengin mut ka la hlau a ni,” a ti.
A sawi dan chuan khualbukah hian a lut a, darkar rei vak lo chawla a mut hnuah tlai dar 3:30 velah a tei chhuak.
Darkar rei vak lo hnuah letin zanriah ei turin a inthlak a. Rim a hre tan ta a; mahse, a hnuai lama chhang siamna hmun atanga chhuak emaw a ti mai a. Zanriah ei zo a let leh chuan rim na zawk a hre leh a, pindan danga insawn a dil ta a ni.
Zan laiah thawktuin kai thovin a luh hmasakna pindanah chuan an ko va. Police-in an lo nghak reng tawh a, DNA sample an laksak bawk a. Lungngai lo tur leh a titu nia an hriat chu man a ni tawh tih an hrilh.
Police hian a bak kimchang an sawi lo va; mahse, video an tihchhuahah Lanzhou khawpui pan tur relah a titu nia rin hi an man tih a lang.
Zhang-a hian a thil tawn hi puanzar pawh a duh lem lo va; mahse, khualbukin social media vela an pha tlat mai chu tha ti lovin a puang ve ta niin a sawi.