National students’ union of India (NSUI) Mizoram state-in District institute of education and training (DIET)-a thawk ten thla ruk zet hlawh an lak tawh loh avangin hna an thawk thei tawh lo nia sawin, an harsatna hrang hrangte chinfelsak rang takin Mizoram sorkar an phut.
NSUI Mizoram state chuan kum 1953-a din, kum 1988-a CSS hnuaia dahluh DIET chu tun thlengin Mizoram sorkarin state service-ah a la senglut lo tih an sawi a. Mizoram sorkarin thawktute hlawh tur doletna (matching share) a pek theih loh avanga harsatna tawkin, hna an chawlhsan lailawk ta hial niin an sawi.
DIET thawkte hlawh tur chu central sorkarin za-a 60 tumin, state sorkarin za-a 40 a tum thin thu leh state tum ve tur za-a 40 chu state budget-a dah a nih thin loh avangin central-in a tum thin hman zawh a nih hnuah hlawh lamah harsatna an tawk ta niin NSUI Mizoram state chuan an sawi a. “Para-academic staff post engemawzat kum 2021 atanga central-in an hlawh a rawn pek tawh loh te chu tun thlengin an dinhmun chinfel a la ni lo” an ti bawk.
NSUI Mizoram state chuan “National education policy (NEP) 2020-in stand alone institution a phal tawh loh avangin DIET kal zel dan turah sorkarin ruahman fel tak a siam thuai a ngai” an ti a. An harsatna hrang hrangte chu sorkarah vawi tam tak an lo thlen tawh ṭhin mahse, ngaihpawimawh an hlawh ngai lo niin an sawi.
“DIET a thawk te chuan hnathawh ngaihna a awm tawh lo nia hriain an hna an chawl a. An harsatna sutkian a nih theih nan theihtawpa hmalakpui zel kan tum a. Mizoram sorkarin a rang thei ang bera an harsatna a ngaihtuahsak hi kan phut tlat a ni” NSUI Mizoram state chuan an ti bawk.