A manganthlak piah lam a ni ta. Tunhnai atang khan hlaphuah thiam artist lar tak takte’n mi hla ruk thubuai an hmachhawn malh malh a, court thubuai nei zak zak pawh an tam. Heng zingah hia Ed Sheeran a langsar a, tun tuma thubuai ah hnehna a chan lo a nih chuan rimawi khawvel chawlhsan thlengin rilru a siam ni hiala hriat a ni.
A hla lar tak, ‘Thinking Out Loud’ chu Marvin Gay hla, ‘Let’s Get It On’ hla thu leh thluk a ru nia puhna thubuai chuan ziaawm lam a pan thei meuh lova, Ed sheeran hian heti anga inpuhna leh thubuai insiamsak hi a kham hle tawh a in ang. Court-a a inlan hnuhnung berah pawh guitar nen a hla hi sachhuakin, tu hla mah a ruk loh thu leh ama irawm chhuak liau liau a nih thu uar takin a sawi.
Hetih lai hian tuna a laka thubuai siam mekah thiam a chang lo a nih a, court-in a lam a hawi lo zawnga thutlukna a siam a nih chuan rimawi khawvel chhuahsan fel hmak a music reng reng bansa a tum hi hial awmin media hrang hrang tarlan a ni a, mimal takin Sheeran hi a lungawi lo hle. Hla a phuah dawn reng rengin video nena record thlap thlap thlengin a ti tan a, heti ang hi tunhma lam a tih ngai lo leh buaipui loh thil a nih vangin mood-a chen pawh harsa a ti viau thin.