Mexico City-a khawpui chhung inkalpawhna rel (metro), kawngpui chunga kal chi chesualah mi 23 vel an thi a, mi eng emaw zatin hliam an tuar bawk.
Rel pindan eng emaw zat chu a kawng atangin a hnuaia kawngpui lun takah a tla thla hlawm a, car pakhat a delh.
Chhanchhuah hna thawktute lek kangthelh pawl chuan Thawhtanni zan tlai tawh taka chhiatna thlenga dam chhuakte an zawng mek.
Chhiatna hi metro Line 12-a Olivos station-a thleng a ni.
Tual chhung chanchinbute chuan kum 2017-a lirnghin hnuah khan a kawngah hian a khi a awm niin a bul hnaia chengte sawi an tar lang a. Mexico-a El Universal chanchinbu chuan inkalpawhna lama thuneitute pawhin khi a awm tih sawi a awm hnu hian a siam that hna an thawk niin a tar lang bawk.
Mexico City Mayor Claudia Sheinbaum chuan mi 23 an thi tih a sawi a, chhiatna a thlen hnu lawkah hian mi zawn leh chhanchhuah hna thawktute pui turin a hmun hi a thleng nghal nghe nghe.
Mi 70 chuangin hliam an tuar niin emergency services chuan a sawi.
Rel pindan tla sawp karah hian mi an la tang em hriat a ni lo va, thi zat hi pung thei a la ni.
“Thawm ring tak kan hria a, kan tla darh nghal suau a ni,” tiin kum 26 mi, he chhiatnaa dam chhuak, Mariana chuan El Universal hnenah a sawi.
“Pindanah khan a then thu leh ding kan awm teuh,” a ti a, rel pindan chung chu a han tauh zawk tih a sawi.
“Ka hliam na lo hlauh va, tukverh atanga chhuak turin mi dang ka pui nghal a ni,” a ti.
Thil thleng hmutu pakhat chuan Televisa TV hnenah, “A kalkawng a nghing dur dur a, vaivut khu a reh hnuah pui turin kan tlan nghal a, te thawm a awm lo va, an zavaiin an hamhaih a ni mai thei,” a ti.