Zirtawp zing khan NBA Conference play-off semi-final khelh chhunzawm a ni a. Champion lai Golden State Warriors chuan game khatnaa an hneh loh Los Angeles Lakers chu point 127-100 in an hneh a, series-ah 1-1 in an nih rual.
Semi-final thawh hnihnaah hian game hmasa zawka hnehna chang tawh LA Lakers in bul an tan tha viau a, quarter hmasa berah point sarih zetin chungnung zawkah an tang nghal. Bul an tan that em vangin hnehna chang nawn turin an inringtawk hman viau nang a, champion lai Warriors er let an tuar lo thung a, an pawr zuih.
Bul tan tha lo Warriors hi quarter hnihnaah an insiamtha a, quarter hnihnaah tha zeta inlanin point 18 zetin chungnung zawkah an tang ta mai a. Point 11 zeta hmahruai chungin chawlhlawk an hmang.
Chawlhlawk hnu lamah Stephen Curry leh a khelhpuite an khel tha chhunzawm zel a, quarter thumnaah point 19 zetin chungnung zawkah an tang leh ta mai a. Quarter hnuhnung ber an khelh dawn meuh chuan point 30 zetin Warriors hi an sang fal der tawh a, chak tur zawk a chiang tawk viau tawh. Game hnihnaah an tlawm ngei dawn tih chiang tawh LA Lakers hi quarter hnuhnung berah point thumin rawn sang zawk leh bawk mahse an khingpuite hi point 27 zetin an umphak lova, chiang takin an tlawm ta nge nge a ni.
LA Lakers an hneh let tum hian Golden State Warriors tan Klay Thompson chu point thawkchhuak hnem ber niin point 30 a thawkchhuak a. MVP tum hnih lo ni tawh Stephen Curry chuan point 20 a thawhchhuah bakah assist vawi 12 a nei tling bawk. Warriors lakah an tlawm tum hian LA Lakers player pawimawh LeBron James chuan point 23 a thawkchhuak a, an tawm tlawn tho nia a lan tawh vangin quarter hnuhnung berah chuan James hi bench-ah a thu tluan thung.