May 6, 2023 zan khan Lawngtlai district Chakma Autonomous District Council (CADC) huam chhunga Geraguluksora khuaah LPK truck a chesual a, mi pariat an thi a, mi dang 12 an hliam.
Lawngtlai atanga thudawn danin Inrinni zan dar 6:30 vel khan Longpuighat khaw mi, Ashok Chakma khalh LPK registration number No. MZ-01J/7038 chu tlan liamin a thlang buh hmunah a tla a, feet 20 vel a lum.
Lirthei chetsualna hmunah mi chuang mipa hlir pasarih an thi nghal a, mipa pakhat chu damdawi in panpui laiin a hliam tuar lovin a thi leh bawk.
Thite hi Geraguluksora khaw mi vek an ni a, Adi Chandra Chakma (17), Amar Jyoti Chakma (14), Anilmoy Chakma (40), Anandamoi Chakma (38), Santosh Chakma (35), Tolbish Chakma (14), Amarjit Chakma (40) leh Lokhi Kumar Chakma (50) te an ni a; an ruang hi police-in an endik (inquest) bakah nimin khan post mortem examination tih a ni.
Borapansury CHC-ah doctor leh nurse an awm loh avangin hliam enkawl ngai an awm takin tiin tlawmngaiin ECM missionary nurse-te an kal a, Chhotapansury-a awm BSF-ten hliamte an lo enkawl bawk a ni.
Borapansury CHC-ah doctor leh nurse an awm loh avangin hliamte hi Chawngte-ah lak an ni a. Hliam na zualte chu Lunglei District Hospital-ah thawn an ni bawk.
Thudawnna pakhat chuan LPK-a chuangte hi Congress party mi campaign an ni a. Nimin zinga Kamalanagar-a Chakma District Congress Committee thukhawm chuan he chetsualna a nunna chân chhungte an tawrhpui thu sawiin hliamte tanpui tura MPCC ngen ni se an ti a. Tanpuina atan hian vehbur khawn ni se an ti bawk.