Lawipu Veng Branch YMA ten bungraw dahna in an sak chu bialtu MLA VL Zaithanzama’n Inrinni khan a hawng.
Hawnna inkhawmnaah Aizawl West III bialtu MLA chuan thu sawiin, ram hrang hranga Zohnahthlak unau awm te hi inen hrang mai lova insuihkhawma zai khata luankhawm hi a tul tak zet tih a sawi a. Zohnahthlak te an tanruala an inpumkhat phawt chuan hnam ropui leh chhuanawm tak an ni chho ngei dawn tih a sawi.
VL Zaithanzama chuan Mizo te hian ram zau tak nei mah se, a chhunga chengte an inpumkhat loh chuan awmzia a nei lo tih a sawi a. “Mizo hnamah tu pawh an rawn tel duh chuan lawm taka kan pawm thiam hi a pawimawh tak zet a ni. Mizo hnam nih duh lem lo erawh buaipui dan tawk thiam a har khawp ang,” a ti.
Lawipu YMA bungraw in siam that leh tihzauh hna atan MLA fund Rs 1,50,000 sen a ni.