Central YMA kaihhruaia Mizoram Kohhran Hruaitute Committee (MKHC), political party hrang hrang, Mizoram Journalists’ Association (MJA) leh NGO hrang hrangte thukhawmin Manipur tual chhung buaina avanga Zohnahthlak unaunate tawrhna chungchangah sorkar laipui dawra aiawh intirh an rel.
Inrinnia Central YMA pisa, Tuikhuahtlanga pawl hrang hrangte thukhawm chuan Manipur-a Zohnahthlakte harsatna tawh dan leh tanpui dan tur te, Mizoram mi leh sa tangkhang bakah sahimna zawnga Mizorama kalte tuamhlawm dan tur an sawi.
Pawl hrang hrangte thutkhawm hnua thuchhuah intawm an siamah Manipur tual chhung buaina avanga mi tam takin nunna an chân leh in leh lo leh sakhaw biak in hal leh tihchhiat a ni hi pawi an tih thu leh thinlung taka an tuarpui thu an sawi a. Manipur-a remna leh muanna tha tak a awm theih nan chak taka hma la turin Manipur leh central sorkar an ngen a, Mizoram sorkar pawh chak taka hma la zui zel turin an ngen.
Ei leh bar, ni tin mamawh hrang hrangah harsatna an tawh lohna turin tan la tlang tur leh he buaina avanga mi mal hlawkna leh inhaivur zawnga hma la lo turin Mizo mipuite an ngen a. Manipur atanga sahimna zawnga lutte tumah inthliarna awm lovin lawm taka dawngsawnga lo tuamhlawm tur te, Manipur-a tangkhang mek Mizoram mi leh sate him taka Mizoram an lo let theihna tur leh an chenna hmuna nunphung pangngai tak an kalpui ve leh theih nan hma la turin Mizoram sorkar an ngen.
Manipur buaina avanga Zohnahthlak unaute tawrhna chungchang leh a kaihhnawihte chu sorkar laipuiah thlen nise, lamkal atan political party, NGO leh MKHC ten aiawhte New Delhi-ah sorkar laipui thuneitute dawr nise an ti bawk.
He buaina avanga harsatna tipunluntu ni lov remna siamtu ni theuh turin Mizo mipuite an ngen bakah buaina avanga Zohnahthlakten harsatna an tawh leh a kaihhnawih chungchanga Mizoram sorkar leh Central YMA hmalaknaah lawmawm an tih thu leh an hmalakna hi an thlawp tlat thu an sawi.
He thutkhawmah hian political party – BJP, INC, MNF, ZPM leh PC aiawhte bakah MKHC, MJA, MUP, MHIP, MSU an tel a ni.
Pawl hrang hrangte thutkhawm hma hian Central YMA hruaituten Chief Minister Zoramthanga chu a bungalow-ah hmuin Manipur buaina avanga Mizo tangkhangte him taka hruai haw an nih theih dan tur an lo sawipui tawh a ni.