India hmarchhak, Manipur-a chi leh chi intihbuaina thlengah mi tam tak thah an ni tawh a, chenna in, lirthei, biak in leh temple beih niin mi sang tel chenna tur nei lovin an awm mek tih thuneituten an sawi.
Tharum thawhna hi kar hmasaa ram leilung faten he state-a cheng tam ber hnamin tribal nih an tum vena duh lova kawng an zawh atanga intan a ni.
Manipur-a cheng zinga 53% vel, Meitei-te hian Scheduled Tribe category-a tel ve hi kum tam tak an lo nawr tawh a, an tel ve chuan ramngawah khawsain sorkar hna leh zirna inah an tan hmun hauhsak an ni ang.
Scheduled Tribe huanga awm sa, a bikin tlangrama cheng Kuki-te chuan Meitei-te thil phut hi pawm a nih chuan an thlahtute atanga an lo chenna ramngaw chu an luahsak mai an hlau.
Thawhtanni khan Union Home Minister Amit Shah chuan news channel pakhatah Manipur boruak chu thunun tawh a nih thu leh mipuite pawh buaina siam zawnga awm lo turin a ngen a. Manipur sorkar chuan thutlukna a siam hmain kil hrang hranga mite a kawm hmasa dawn tih a sawi bawk.
Sipai sang tel tirh luh niin district eng emaw zatah curfew puan a ni a, internet tihtawp a ni bawk a. Kar hmasa phei kha chuan governor-in ‘thil uchuak bikah’ chuan ‘a hmunah kah nghal’ thupek a lo chhuah hial tawh a ni.
Nilaini atanga buaina chhuakah hian Imphal khawpuiah mipui thinrimin lirthei an suasam a, chenna in leh dawr an hal a. District dang eng emaw zatah pawh hetiang hian chetna a thleng.
Video leh thlalak thehdarh hrang hrangah chuan in kang lai te, meikhu chhah leh dum takin khawlai a zin hnan chuk laite pawh a lang.