Aizawl: Manipur-a Zohnathlak leh Meitei inkarah remna leh muanna a thlen theih nan Lalbiakthanga chuan Aizawl atanga Imphal thleng kea kala Peace March neih a tum.
Kum 65 mi, Lalbiakthanga hi Sailulak khaw chhuak niin Lawipu venga khawsa a ni a. May 10, 2023 zing dar 7 hian Aizawl atangin a chhuak dawn a, Tuikhurhlu ban a tum.
Lalbiakthanga hi MJA President C.Lalrambuatsaiha’n Vanapa Hall kawt atangin a vai liam ang.
Lalbiakthanga hi ram leh hnam vei mi, remna leh muanna duhtu a ni a, kum 2021 khan Burma rama remna leh muana a thlen theih nan Aizawl atangin Zokhawthar thleng a kal tawh a, ni sarih a thang.
February, 2022 khan India Independence kum 75-na denchhenin hnam inpumkhatna leh khawvel puma remna leh muanna a thlen theih nan Mizoram district khawpui leh tlema khaw lian chin chu kein a fang chhuak vek a, Vairengte atanga tanin chhim tawp a thleng a, khawchhak tlangdung hrut lehin hmar lam Sakawrdaiah a tawp a, ni 40 a thang.
Tun tumah hian a thang chin tur a sawi thei lo a, Churachandpur thlen phawt a, boruak a that zel chuan Imphal thlen ngei a tum dawn a. Thawmhnaw leh ei in tur engmah keng lovin a hak lai nen chauh a chhuak dawn a ni.