Aizawl: Mizoram Cooperative Apex Bank Ltd Chairman T Lalmuanpuii’n cooperative society hruaituten kum 10 aia rei nihna an chelh theih lohna dan awm chu sorkarin a paihsak ngei an beisei tih a sawi a, he dan hi society hruaitute nih tumte hmalakna avanga duan nia an ngaih thu a sawi.
He thu hi nimin Apex Bank Office, Tuikual South-a thuthar thehdarhtute a kawmnaah a sawi a, Mizoram Cooperative Societies Act hnuaiah society hruaituten kum 10 aia rei hruaitu nihna an chelh theih lohna dan a awm thu te, he dan hi state level cooperative society zawng zawngin an duh lo a, kum 2016 khan an assembly-ah theuh dan hi paih a nih theih nan member zawng zawngin ban phara an lo pass tawh thu a sawi.
Muanpuii chuan he dan hi cooperation department-a an hotu thin, pension tain hruaitute a nih theihna tur atana a duan niin a sawi a, dan hi cooperative hmasawnna daltu a nih thu leh cooperative movement nung tak kalpui mek tichhetu nia an ngaih thu a sawi.
He dan hi paih tura chief minister an lo ngen tawh thu te, thu a lo rawn angin he dan paih duhtu society-te signature leh seal la khawmin an theh luh tawh thu leh sorkar thuthlukna an ngaihchan mek thu a sawi a, cooperative society hruaitu thlan hun a hnaih tawh thu leh inthlanna neih a nih hma ngeia dan chu paih a nih an beisei thu a sawi bawk.
Apex Bank chairman chuan an bank dinhmun pawh sawiin March 31, 2023 thlenga Apex Bank-a sum dah luh zawng zawng chu Rs. vaibelchhe 1,455.5 a ni a, Rs. nuai 3,974.63 an hlep a, deposit an hmuh atanga loan an pek zat percentage CD ratio chu 75.38% a nih thu a sawi.
Apex Bank dinhmun chu siam that chhoh zel a ni a, tun hmain bank dinhmun that tawk loh avanga share holder-te hnenah share pung pek ngai loh pawh kum 2021 atang khan pek a nih thu te, internet bank service leh G-pay hman theihna te pawh an neih tawh thu te a sawi.
A mi mal chanchin sawi tel bawkin MLA in-candidate tum anga a chanchin an sawi chu thu dik lo a ni a, a thawh theih chhung chu coopreative-a inhman a tum thu a sawi bawk a ni.