Manipur-a tual chhung buaina thleng avanga an sahimna zawnga Mizorama tlan lut chu mi 2,864 an tling tawh a, raltlante hi district parukah an lut tawh.
Mizoram sorkar chhinchhiah chinah nimin tlai dar 7:00 thlenga Mizorama tlan lut chu mi 2,864 an tling tawh a, raltlan luh tamna ber, Saitual district-ah mi 1,042, a dawttu Kolasib district-ah 1,016, a bak district dang – Aizawlah 735, Champhaiah 60, Khawzawlah pasarih leh Serchhipah raltlan mi pali an lut tawh a ni.
Serlui bial chhunga khaw 14-in raltlan mikhual an nei nual tawh a, khaw tam zawkah chuan raltlante hi community hall-ah awm khawmtir an ni.
Helai bialtu MLA Lalrinsanga Ralte chuan khaw thenkhata raltlante chu buhfai leh an mamawh leina tur sumte a pe a, a hmalaknain supply department-in Serlui bial chhunga raltlante tan buhfai quintal 80 pein, nimin khan khaw hrang hrangah sem darh a ni.
Lengteng bialtu MLA Dr L Thangmawia pawhin a bial chhunga raltlante luhna khua a tlawh kual mek a, nimin khan Ngopa khuaa raltlante a tlawh bakah raltlan lo dawngsawng tura Ngopa khawtlang hruaitu duty-te a tlawh bawk.
Ngopa khuaa tlan lutte hi Youth Development Centre-ah awmtir niin, heng mite hman tur hian MLA Dr Thangmawia chuan Syntex 2,000 ltrs a pe nghal bawk a ni.