India chhim lam, Karnataka-a mipuite chuan Nilaini khan assembly inthlanah vote an thlak ta a, inthlan hmaa ngaihdan lakah chuan eptu, Congress party chu Prime Minister Narendra Modi-a kaihhruai ram puma roreltu aiin dah san zawk an ni.
State legislature bioal 224 awm inthlana vote tlate hi May 13-ah chhiar a ni dawn a, he inthlan hi nakum May thlaa ram pum inthlan hriltu ni thei hial tura ngaih a ni.
Karnataka khawpui, Bengaluru hi India information technology hmunpui niin thalai mi thiam tak takte hna thawhna hmun a ni.
Modi-a telna, BJP tan chhim lam state zingah ro an relna awm chhun a ni a. Saffron party hi hmar lam, laili leh khawthlangah chuan an tha a, chhim lama Kerala, Tamil Nadu, Andhra Pradesh leh Telangana-ah chuan anmahni eptute vekin thuneihna an chang.
Tun tumah hian BJP hi mipuiin an ning nia ngaih a ni a, thil man a sang a, ei rua puhna leh hmasawnna an thlen tlem tia puh an ni bawk.
Political analyst A Narayana chuan mipuite hi BJP sorkar lakah an thinrim niin a sawi.
“An thinrimna hi vote-ah an tilang a nih chuan BJP tana lungngaihna leh Congress tana hlimna tur a ni,” a ti.
Mi thiam dang, Sandeep Shastri pawhin hetiang ngaihdan tho hi neiin, “Congress hi hmahruaitu zawk an ni,” a ti.
BJP hian hnehna an chang ta a nih chuan Congress hruaitu lawk, Rahul Gandhi-a dinhmun an tihniam duai dawn tihna a ni a. Congress an chak ve thung a nih chuan an party tana campaign-a thawk rim tak, Gandhi-a tan a hlu hle dawn thung.
Mihring maktaduai 61 chenna, Karnataka hi chi/hnam bila vote kalna hmun a ni a. A tam ber, Lingayat hnamte hi 17% niin an hawi lam hian bial 100 zet a nghawng phak a. An zingah BJP hruaitu an tam avangin an innghahna a ni.
BJP hian sakhaw hmun pawimawh tak tak nei nen pawh inzawmna an nei tha a, hnam leh chi zingah Vokkaliga, Kuruba, Valmiki, Nayaka leh Madiga nen pawh inzawmna an nei tha.
Tuipui kam lam, Hindu tamnaa a tlem zawk, Muslim awmna hmunah pawh hijab (lu tuamna) avangin boruak a tang hle bawk.
Nikum khan Udupi district-a sorkar sikul pakhat chuan zirna in chhunga lu tuam an khap a, Muslim-ten nasa taka dodalin zir tur leh sakhaw zalenna an neih chu dansak tumna niin an puh.
Hemi ep chiah hian Hindu zirlaiten saffron shawl an bat a, hei hi an sakhaw rawng, Hindu-te rawng ngainat a ni.
A hnuah court-in zirna ina lu tuam khap chu kaltlangtirin Islam sakhaw danah lu tuam ngei ngei tur tih a awm lo niin a sawi.
Kum 2011 chhiarpui atanga a lan dan chuan Karnataka-a cheng 83% chu Hindu an ni a, Muslim 13% dawn leh Kristian 2% tling mang lo an awm ve bawk.