Manipur-a Mizoram mi leh sa tangkhangte chu hruai chhuah zel an ni a, zirlai nu leh paten lawmthu an sawi.
Civil Aviation hnen atanga thudawn danin, nimin khan Manipur-a tangkhang mi 37-ten Lengpui Airport thleng lehin Agartala atanga Lengpui Airport-a tum hi mi 12, Imphal atanga Guwahati-a lut phawta Lengpuia tum mi 13, Imphal atanga Kolkata pan phawta Lengpuia tum mi 12 an awm a ni.
Imphal-a Mizo zirlai nu leh pate chuan an fate him dam taka hruai chhuah an nih avangin sorkar chungah lawmthu an sawi a, thuchhuah an siamah chuan Manipur-a buaina chhuak avanga an tu leh fate imphal-a awmte mangang leh thlabar taka silaimu kara mittui nena an awm mek laia Mizoram sorkar hotuten zirlai tangkhangte thlamuanna tura venhimna leh Mizoram lama hruai haw an nih theih nana an hmalakna ah lawmthu an sawi.
Buaina chhuah tan tirh atangin chief minister-in him taka zirlaite hruai chhuah an nih ngei theih nan theihtawp a chhuah tih te, home department-a thawktute leh an haw kawnga Kolkata leh Guwahti Mizoram House-a thawktuten duat leh duhsak taka an lo dawnsawnnaah te, sorkarin an haw man thlawhna, bus, sumo man, an riahna, ei leh in te a thlawn veka a ngaihtuahsak avangin an lawm hle tih an sawi a ni.