Congress chuan Karnataka assembly inthlana hnehna an chan hnuah chief minister turah duhthlan tur zawk an chiang lo mek a, state chief DK Shivakumar leh an hruaitu hlun, Siddaramaiah te chuan chanvo sang ber hi nih an tum ve ve.
Hruaitu pahnihte hi Thawhtanni khan Delhi an pan ve ve tura ngaih a ni a, party hotu sang zawkte nen an inkawm ang.
Pathianni khan party-in observer team a ruat pathumte chuan Karnataka-a MLA thlan tharten chief minister tur an duh an sawipui tawh a. Team hi Delhi-ah let leh tawhin an party hruaitu liante hnenah an hlan chhawng dawn a, Congress President Mallikarjun Kharge, Sonia Gandhi, Priyanka Gandhi Vadra leh Rahul Gandhi te ho nen an sawiho leh dawn a ni.
Thutlukna hi Kharge-a siam leh puan tur a ni a, Pathianni zana MLA intawh khawmah hian general secretary pathum – Sushil Kumar Shinde, Deepak Babaria leh Jitendra Singh Alwar te an tel a ni.
Shivakumar leh Siddaramaiah duhte chu Bengaluru khualbuka an thutkhawm lai hian a kawtah pung khawmin an mi duh chu chief minister atan awm se an duh thu an aupui ve ve.
Thawhtanni khan Shivakumar-a hian a hna leh tir tur chu a hlen tawh a, tunah chuan ‘party hotu lian zawkte’ thu thu a nih thu a sawi.
“Resolution kan pass a, party hotu sang kutah kan dah a ni. Ka tih tur zawng zawng chu ka hlen tawh,” a ti.
Karnataka chief minister leh a cabinet thar turte hi Ninganiah lak luh an ni dawn nia sawi a ni.
Congress hi May 10-a inthlanah khan bial lak leh vote hmuh (share)-ah kum 30 chuang chhunga an chet that ber a ni a. Hetih chhunga an chet that ber chu kum 1999 kha niin bial 132 lain vote tla zinga 40.84 an chang a. Kum 1989 khan bial 178 lain vote tla zinga 43.76% an chang bawk.
BJP erawh chuan kum 2018-a bial 104 an lak atangin tun tumah hian 66-ah an tla thla a. Scheduled Tribe (ST) category tana bial hauhvah phei chuan chakna an nei lo va. Karnataka-ah hian bial 51 zet hauh awmin heng inga 36 chu Scheduled Caste (SC) tan niin 15 chu ST tan a ni bawk.