United States chuan sakhuana avanga tihduhna thleng thin chu dem turin India a ngen tih sorkar thuneitu sangin a sawi a, hei hi Prime Minister Narendra Modi-a’n an ram a tlawh hma lawka a tih a ni.
US State Department hian Thawhtanni khan sakhaw zalenna dinhmun tar lanna, kum tina tihchhuah thin report a tichhuak a. He report-ah hian sakhaw zuitu tlem zawk, Muslims leh Kristian pawh telin, India-a an dinhmun tar lan a ni.
US thuneitu sang chuan he report chungchanga thuthar lakhawmtute a kawmnaah India chu a ram chhunga sakhaw zuitu tlem zawkte beih an la nih fo chungchangah ‘huai takin tawng se’ a duh tih a sawi.
“Keini chuan hetiang thil thlengah hian sorkar chu na taka demna thu sawi tur leh sakhaw zuitu tlem zawk an nihna behchhana an laka chet thawhna thleng thinah hma la turin kan nawr reng a ni,” a ti.
An ngaimawh zual a sawi zingah ‘langsar taka Muslim suat an ni te, tihduhdah leh tharum thawhna thlen zui thei tura an huat tak thil sawi te, sakhaw hmun leh an in beih te bakah thenkhat laia hetiang pawikhawihtute ngaihhnathiamna awm thin te’ a tel tih a tar lang.
Hemi chungchangah hian Indian thuneitute pawh hmaichhanah an be dawn tih a sawi a. “A hmuna awm vantlang huap pawl leh chanchinbumi huaisen tak tak, hetiang thil thleng ziaktute nen kan thawkho zel dawn a, kan vil zui reng dawn a ni,” a ti.
India-ah hian mihring tluklehdingawn 1.4 cheng zingah 14% pawh tling pha lo chauh Muslim an ni a, Hindu sakhua chu 80% dawn an ni thung a. Kristian phei chu 2% chauh an awm.