Lalsangzuala (31), Mission Vengthlang, Aizawl chu tukin dar 5 vel khan Chhiahtlang leh Bukpui inkar kawng thlang ft 60 vela thuiah thi-a hmuh a ni a, mi kuttuar ngei nia rin a ni.
Lalsangzuala thihna chungchangah hian Mission Vengthlang LC leh tlawmngai pawl hrang hrang ten thuchhuah intawm siamin, he thil thleng pawi an tih thu leh na an tih thu an tarlang a. Pawikhawihtu man chhuaka, a phu tawk hremna pek ngei an phut.
Mission Vengthlang LC leh NGO te chuan Lalsangzuala ruang hmu hmasaa lo buaipuitu leh kuang lo siamsaktu Bukpui YMA leh khawtlang mipuite leh a tul apiang buaipuitu Police leh Serchhip Damdawi in lama thawk te chunga an lawmthu an sawi bawk.
Thudawnnain a sawi danin, Chhiahtlang leh Bukpui inkar, Chhiahtlang atanga km 1.5 vela hla kawngpui-ah tukin dar 5 vel khan Chhiahtlang mi feh kal turin thisen tharlam leh sana leh chapal bakah mobile phone te an hmuh avangin bul vel chu an enfiah a, kawng thlang ft 60 vela thuiah Lalsangzuala ruang chu an hmu ta a. Khawtlang hruaitute hriattir nghalin, khawtlang hruaitu ten Police lam an hriattir ve leh a ni.
Aizawl atangin Forecsic lam mithiam ten he thil thlenna hmun hi an pan nghal a, ruang leh ruang an hmuhna chhehvelte an endik hnu ah Lalsangzuala ruang chu Serchhip Damdawi In-a post mortem a nih hnuah an chenna Mission Vengthlang lam panpui a ni a, naktukah vui a ni ang.
He thil thleng chhui zui tur hian Serchhip SDPO kaihhruai Special Investigation Team (SIT) din nghal niin, an ni hian a tul ang te bawhzui nghalin, he thu buatsaih lai thleng hi chuan man an la nei lova, ngawrh takin an chhui zui mek a ni.
Thudawnnain a sawi danin, Lalsangzuala hi NHIDCL hnuaia Computer operator hnathawk niin, a motor (Bolero) chu a thawhna NHIDCL hian man chawiin an hmansak bawk a. Nimin khan Aizawl atangin motor dangin Chhiahtlang a pan a, Chhiahtlang dai a thlenin, a motor (Bolero) khalhtu Lalramtluanga’n a va hruai a, a motor khalhtute In-ah hian a riak nghal a. In atanga a chhuah leh lai hi a riahna te chuan an hre lova, zingah a motor leh amah chu an lo awm tawh lo tih an hre chauh niin thudawnna chuan a sawi.
A motor chu a ruang an hmuhna atanga hla angreng tak, khaw chhungah, Chhiahtlang Chhim Veng YMA Run bulah mi thing dahkhawm su chhiain a lo awm niin thudawnna chuan a sawi bawk.