Nilaini khan Novak Djokovic chu Italian Open quarter-final paltlang zo loin a tla a, umpire Mohamed Lahyani nen an inhnial ngial nghe nghe!
Karleh maia kum 36 tling tawh tur Serb top seed hi Danish star Holger Rune chuan 6-2 4-6 6-2-in a hneh a, kum 2013 hnu lama tawha Italian Open-a a tlak hma ber tum a la ni.
Kum 20 mi Rune laka mualpho Djokovic hian Rome clay-ah he khawpuia a title pasarihna a beisei a, May ni 28 atanga khelh tan tur French Open atana inbuatsaihna a nih bawk avangin final a lut zo lo hi a tan result chhe tak a ni lo thei lo.
Nikum Paris Masters final-ah pawh Rune hneh loin Djokovic hi a lo tlawm tawh bawk a, Denmark player hian world number one a ngam laklawh tlat!
Seventh seed Rune hian final luh inchuh pakhat zawkah kum 24 mi Norwegian fourth seed Casper Ruud a hmachhawn leh.
French Open atana Serb inbuatsaihna lam hawi zui leh ila, kumin clay court grand slam atana Djokovic-a inbuatsaihna hi a tluang lo ve reng reng a, kiu hliamin a tihbuai avangin tunhnaia khelh zawh hlimhlawt Madrid Open-ah a inlan thei lo a, Rome khaw court-ah kirleh thei mah se a khelh that dan pangngai leh a fitness pangngai a la pha thei rih lo.
22-time Grand Slam champion hian mipa tennis player zinga major title la hnem ber a nihrualpui mek Rafael Nadal kalsana record malkhalh turin Roland Garros lam a hawi zui zel tho a; Italian Open-ah hian a match hmasa lamah Tomas Martin Etcheverry, Grigor Dimitrov leh British number one Cameron Norrie hnehin, Rune lakah pawh harsatna lian tawk loa last four lut tura beisei a ni a, mahse, tarlan tak angin, a la damkawr tih a lang a, last-16 match lama Norrie a paltlang tum pawh khan nidanga a khel a pha lo hrim hrim a; karleh hian ATP ranking lamah number one a nihna pawh Spaniard Carlos Alcaraz chuan a chhuhsak leh rih dawn nghe nghe.
Djokovic a tla fel a, hliam vangin Nadal a inlan thei lo a, chutih a nih avangin kumin Rome men’s singles final hi kum 2004 hnu lama Djokovic leh Nadal-te zinga a tu emaw zawk zawk tel loa an khelh vawikhatna tur a ni!
Nilaini inkhel dangah French Open runner-up Ruud chuan 7-6 (7-5) 6-4-a Argentine 24th seed Francisco Cerundolo hnehin, kum zawnin Italian Open semi-final a lut.
Italian Open women’s draw lamah Jelena Ostapenko pawhin a vawikhatna atan semi-final thlengin, Paula Badosa lakah 6-2, 4-6, 6-3 hnehna a chang.
2017 French Open champion Ostapenko hian final luh inchuh pakhat zawkah seventh seed Elena Rybakina hmachhawn zui lehin, hliam avanga a tumpui tur world number one Iga Swiatek a inhnuhdawh avangin Rybakina hian hahdamin last four a lut.
Set hnihnaah Rome khaw tournament liana vawihnih defending champion ni tawh Poland star Swiatek hian ‘medical timeout’ a ko a, a ke an han tuamsak ngial chungin Polish top seed hi 2-2-a set thumna a nihrualpui laiin a inhnukdawk zui ta tho a ni.