Grand Slam-ah vawi 22 zet champion tawh a, ‘Clay Court lalpa’ an tih hial Rafael Nadal chu hliamin a tibuai mek a, Nadal hian vawiin hian French Open a hmachhawn theih loh tur thu a puang chiang dawn niin tarlan a ni.
Spain chanchinbu lar Marca tarlan danin Nadal hian Mallorca-a tlai dai 4:00-ah press conference a nei dawn a. Chanchinbu mite hmaah French Open 2023 a hmachhawn dawn loh thu a puang tura ngaih a ni. Roland Garros-ah a inlan thei lo a nih chuan he hmuna a rorelna a tawp zui ve tawh tura ngaih a ni.
Nadal hian kum 2005 atang khan French Open hi kum tin a la hmachhawn zat zat a, vawi 14 zet a champion tawh. Roland Garros-ah hian inkhel vawi 115 a hmachhawn tawhah vawi 112 zet a chak a, vawi thum chauh tlawm zawkah a tang. A ropuina mualah inlan thei se Grand Slam-ah vawi 23 champion in, mipa lama champion tam ber ni thar leh thei tura ngaih a ni a, Djokovic lehpelh theihna hun tha a hloh dawn niin a lang.
World No 1 hlui Nadal hian khelbawr hliam vangin kum 2023 a hmang tha lo viau a. A hliam hi ziazawm chho tan mah se inelna hautak Grand Slam hmachhawn a, set nga khel tur chuan a taksain a la tlin lova ngaih a ni. Nadal a inlan thei lo a nih chuan Grand Slam-a vawi 22 champion ve tawh tho Novak Djokovic tan mipa lamah Grand Slam-a champion ngun ber nihna kawng a inhawng zau leh zual dawn niin a lang.