Manipur-a tual chhung buaina chhuakin ziaawm lam a la pan thei lo a, Zohnahthlakte leh Meitei inbeihnaah Zohnahthlak lamah thi leh hliam tuar eng emaw zat an awm.
Churachandpur atanga thu dawn danin kar kalta Inrinni zan atang khan Manipur khawpui, Imphal atanga tlangram lam luhna, Churachandpur luhna kawng velah Zohnahthlakte leh Meitei an inep a, silai pawh a puak nasa hle a, nimin lamah erawh boruak ziaawm deuhvin silai puak ri hriat tur a la awm reng thung.
He inbeihnaah hian Zohnahthlak thi leh hiam tuar pawh eng emaw zat awmin, he thu buatsaih tlai thlenga Churachandpur District Hospital thlenpui tawh Zohnahthlak lamah hliam tuar hi mi 11 an awm a, mi pahnihin an thi.
Meitei zingah pawh thi leh hliam eng emaw zat an awm tura ngaih a ni.
Thudawnnain a sawi danin Manipur-a Zohnahthlakte hian mahni khua theuh an veng a, mi tlawmngaiten ‘volunteer’ dinin khua leh mipui venhim hna an thawk a ni.
Meitei lam hi Meitei pawl lian, Arambai Tenggol hmingin an che a, Zohnahthlakte chuan Manipur Police an tel tih hi nghet takin an ring.
Hetiang boruak rit tak hnuaiah hian Indigenous Tribal Leaders’ Forum (ITLF) chuan sorkar laipui chu Manipur tlangrama tribal-te leh an khuate venghim turin central force tam zawk tir lut tur an ngen a, Manipur chief minister paiha president rule-a dah an phut bawk.
Hetihlai hian nimin khan All Manipur Kuki-Zomi Tribal Women, Delhi & NCR huaihawtin Delhi-a Jantar Mantar-ah Manipur-a an unaute thlavang hauhin an pungkhawm a ni.
Kar kalta khan London-a Zofate pawh Indian Embassy kawtah leh prime minister chenna in kawt, Downing Street kawtah Manipur tribal-te thlawpna leh Manipur-a unaute tawrhpuizia an lantir.
Manipur Zohnahthlakte chunga thil thleng chu lungawithlak loh an tih thu an au chhuahpui a, Zohnahthlak eng emaw zat an pungkhawm a ni.