Khualzin mite tela mi 20 chuang chuanna lawngleng chu Italy hmar lama Lake Maggiore-ah thli na tak tleh karah pilin mi pali an thi.
Lawng hi Pathianni zan khan Sesto Calende leh Arona khaw inkarah a chesual niin Italian chanchinbute chuan an tar lang.
Mi panga chhanchhuah an nih hnuah damdawi inah lak nghal an ni.
Italian chanchinbute hian a chuangte hi British, Italian leh Israeli an nih thu an tar lang a, finfiahna erawh a awm rih lo.
Lombardy region President Attilio Fontana chuan an chetsual chhan hi khaw awm dan dik lo vang a nih thu a sawi.
Lawng hi metre 16-a sei niin khualzinten an hman hawh thin a nih thu Facebook-ah a tar lang.
Italian chanchinbu thenkhat chuan lawngah hian mi 25 chuang chuangin piancham an lawm a, ruah thawkin ‘hurricane tenau’ a chang zui ta niin an tar lang a. Letin a pil zui ta a ni.
A chuangte chu pilpui vekin a tam zawk chu vaukamah an inhleuh kai a, thenkhat chu lawng danga chhanchhuah an ni bawk.
Rescue diver leh helicopter hmangin dil chhimtawpah beihpui thlak a ni a, ambulance leh air ambulance a awm bawk.
Firefighter-ten video an tihchhuahah chuan chair leh thil them dangte chu tuiah a lang nuaih nuaih bawk.
Lake Maggiore hi Alps chhim lam, Italy leh Switzerland ramte intawm/inrina a ni a, khualzinte tlawh tam tak hmun a ni.
Tun hnai ni tam vak lo liam ta atang khan heng lai velah hian khaw awm dan a dik lo hle a, Italy-a meteorological service pawhin ruahpui sur theiin an sawi lawk.