Premier League season tawp ni ah EFL Championship a tla thei dinhmun a awm club pathum zingah Everton an dingchang a. Abdoulaye Doucoure goal khung hmangin 1-0 in Bournemouth lakah chakin dinhmun himah an inhlangkai.
Goodison Park-ah Everton in him turin chak an mamawh tih an inhria. Nimahsela tun season a an harsatna lian ber an tuar, goal an khung thei lo.
Cherries tlarhnung thiah an harsat hle. Mahse minute 57-naah Doucoure a inlar a, goal tha bik khungin danglamna a siam. Kum 69 chhung English football inelna sang bera an tel tawhna chu an chhunzawm dawn.
Coach Sean Dyche chuan, “Hmabak a tam a, season thar atan rim takin kan thawh a ngai dawn. Player-te pawh thawhrim an ngaih tur thu ka hriattir tawh.”
“Dinhmun hniam a awm lakluh hi a theih a, hei vang hian chawl miah lova kan beih a ngai.” tiin hmasawn an ngaih thu a sawi.
Kum 2015-16 a champion Leicester City chu kum kua an khelh hnuah an tla thla a. Harvey Barnes leh Wout Faes te goal khung hmangin 2-1 in West Ham United hneh mahse Everton result avangin an him zo lo.
Inhamtang tura beiseina tlem tak nei chunga bul tan Leeds United in Tottenham lakah goal li an chhuah a, kum thum hnuah Championship an khel leh dawn.