Malaysia chuan Chinese lawng lian, Indopui II-na hun laia British lawng lian pahnih kah chhiatte rawktua puh an man.
Bulk carrier hi Pathianni khan South China Sea-ah dan lova an din avangin man a ni.
A chhungah hian kum 80 chuang liam taa Japanese sipaiten an kah pil, HMS Prince of Wales leh HMS Repulse chhunga ralthuamte ni ngeia hriat an an phurh hai chhuah a ni.
UK Ministry of Defence chuan hetianga chetna hi an dem tak zet tih an sawi nghal.
Hmanlaia lawng pil tawhte hi a thir (steel) a tha a, ‘pre-war steel’ tiin an sawi mai zel a. Radiation a tlem a, a vâng tawh bawk a, damdawi leh science lam thil siam nan an hmang nasa hle a ni.
British lawngte pawh hi Malaysia khawchhak lam vaukam atanga km 100-a hlaa awmin mi tam takin an lo luhchilh tawh thin.
Royal Navy indo lawngte hi indopui lai khan Singapore-ah Malaya veng turin an dah nasa thin hle a. Japanese torpedo hmangin December 10, 1941 khan tihpil an ni.
Beihna hi Pearl Harbour-a lawng dah khawm beiha lawng sipai 842 vel zet an thih hma lawk kha a ni a, British naval chanchina chhiatna lian ber a ni.
Sangha mantute leh diver-ten thla hmasaah tawh khan Malaysia tuipuiah ram dang lawng a awm tih hi an lo sawi tawh.
Tual chhung maritime police chuan Pathianni khan Chinese lawng hi an man ta a. Fuzhou-a inziak lut niin thawktu mi 32 an awm niin Malaysian Maritime Enforcement Agency (MMEA) chuan a tar lang.
‘Indopui II-na laia mi ni ngeia rin’ laipui mu an lo kawlte chu an hai chhuahsak a. Malaysian agency-te chuan ralthuam atan hmantlak a la ni em tih an chhui zui mek.
MMEA chuan May thla tir lama an ram chhim lam, Johor state-a mi mal lawng sakna hmuna police-in laipui mu puak lo an hmuh, lawng lian pil pahnih atanga lak ni ngeia an hriat nen inzawmna a neih an ring tih an tar lang bawk.