Premier League chauh ni lo, football khawvela sawi hlawh angreng tak, video assistant referee (VAR) chu Premier League chungchangah sawi neuh neuh awm mah se a duh lotu erawh an tam chiam lo tih hmuh a ni.
YouGov survey thar berin a tar lan danin Premier League fan panga zela pakhat pawh tling lote chauhvin ‘VAR hman tawh loh ni se’ an ti a, thenkhat zingah he system hi duh ang tawka la thawk tha tawk lova ngai an awm ve tho bawk.
2019-20 season-a hman tan a nih atangin VAR chungchang hi sawi hat hat a la ni reng a, tun hnaiah khan Labour hruaitu ni thei tura beisei, Andy Burnham chuan a vaiin hman tawh loh a duh thu a sawi nghe nghe a ni.
Tun hnaia YouGov-in a tar lan danin puitling 434, Premier League football match en hret tak takte atanga za zela 18 (18%) chiahin Burnham ngaihdan chu an tawmpui a ni.
Mi tam zawkte ngaihdan erawh chu he system hi hman chhunzawm zel an duh a, a hman dan erawh siam tha hret se la tih a ni a, survey-a tel 68%-te chuan hei hi an duh a, 12% erawh chuan engmah tihdanglamna awm loa hman chhunzawm zel an duh thung.
Amaherawhchu, VAR lakah hian ngaihdan tha lo a la awm reng tho va, 59% chuan a thawk chhe hle niin an hria a, hei hi kum hnih kaltaa he system chungchanga YouGov survey neih atang khan a la danglam chuang lo.
Inkhel en hrat zual hmun lia thena hmun thum deuhthaw (72%) chuan VAR hian inkhel en a tihhmuhnawm loh phah niin an ngai.
Tihdanglam nual duh mah se a tam zawk chuan offside chungchangah te, red card leh penalty fiah nan te leh ball-in goal line a pel em tih fiah nan te VAR hman a ni chu an thlawp thung.
Mi 10 zela paruk deuhthaw chuan penalty pek tur a nih leh nih loh chungchanga thutlukna siamah VAR hi a thawk tha lo hle niin an ring a, a chanve aia tam hretin red card pek theihna chungchangah chutiang tho chuan an ngai bawk.
Thla hnih kaltaah khan Football Supporters’ Association survey chuan Premier League fan hmun lia thena hmun thumte chuan VAR hman hi an duh lo tih a lo tarlang tawh bawk.
A chhangtu 97% aia tamin VAR hian football en a tihhmuhnawm phah tih thu chu an thlawp lo a, 90% aia tam pawhin field-a kal chilh ngeia inkhel en a tinuam zual tih chu an thlawp lo bawk.
Chumi tum chuan Premier League thupuangtu chuan he league hian ‘entu mipuite tana VAR-in nuam lo a siam theihna ang angte tihhniam hi pawimawh a ti,’ tih a sawi a, “VAR hian thutlukna dik zawk a thlen thin,” tiin a sawi belh bawk.