Sevilla in record an chelhlai pawtsei turin Europa League title an chawi leh a. A vawi sarihna atana champion turin AS Roma chu penalty-ah an hneh.
Nilaini zanah Budapest a Puskas Arena-ah Spanish club in anmahni tantu pungkhawm hmaah trophy an chawi. Nikum World Cup a Argentina tana chakna penalty khungtu Gonzalo Montiel bawkin Sevilla chakna penalty hi a khung a. 1-1 a inkhel pangngai a an inhnehtawk hnuah 4-1 in Sevilla an chak.
Sevilla hian Europa League final tum sarih an khelh tawhah an la champion vek a. Heng zinga hmasa ber hi kum 2006 khan niin hemi tum hian tun tuma an captain Jesus Navas hi team-ah a tel tawh.
Champion trophy an chawi avangin tun season-ah league lamah beisei pha lo hle mahse season thara UEFA Champions League an khel dawn.
Roma in an ui
Italy a hmasawn lam pan AS Roma in beiseina an nei sang. A chhan chu player malkhai a thlirin chak tura rinkai zawk an ni a. An coach Jose Mourinho-a’n Europe huap inelna final a khelh tawhah tlawm a la neih loh avangin inrintawkna an nei lian.
Inkhelah pawh first half-ah an langsar. Italy defender Gianluca Mancini ball pek tha atangin Paulo Dybala chuan goal a khung a, halftime-ah hma an hruai.
Second half-ah Sevilla in an bei let a, chawlhlawk zawhah an insiamtha. Jesus Navas ball cross chu Mancini-a’n an lamah a ti lut palh.
Roma hi chak thei tura huntha nei hnem zawk nimahsela goal an khung thei tlat lova. A tawpah a vanduai zawkah an tang.
Inkhel zawh lam
Sevilla coach Jose Luis Mendilibar hi March thla a Jorge Sampaoli thlaktu chauh a ni a. A team hi La Liga a an inhamtan chu a laka an beisei nimahsela trophy a chawipui.
“He club tana trophy ka chawi hi ka lawm a, he hna ka thawh tirhin kan dinhmun a khirh hle. Tunah club thui taka nghawng thei tur thil tha kan ti a ni.” tiin a sawi.
Roma coach Jose Mourinho chuan, “Final panga ka champion tawh a, ka vawikhat tlawmna a ni. Mahse ka naute ho ka chhuang. An engkim an hlan a, he kawr tana kan tih thin angin kan inhlan vek a ni.” a ti.