All India Football Federation President Kalyan Chaubey chuan tun hnai khan AIFF hmasawnna tur leh that zawkna turin AIFF Core Committee a din a, Member panga awmna Committee pawimawhah hian Mizoram Football Association Honorary Secretary Lalnghinglova Hmar pawh a tel.
He Committee-a Chairman chu AIFF Vice President NA Haris a ni a, Avijit Paul (Odisha) chu Vice Chairman niin Lalnghinglova Hmar bakah Mulrajsing Chudasama (Gujarat) leh Vijay Bali (Punjab) te an ni.
Anni panga hian AIFF chet velna hrang hrang an vil dâwn a, budget leh sum chet vêl dan te, infrastructure lama hmalakna te, competition hrang hrang kalpui dan te, thawktu thar lâk leh chawlhtir dante bakah thil pawimawh dangte an enpui thin ang.
He Committee hi tun hnai khan New Delhi-ah an thukhawm a, an kal zel dan tur an thlir bakah AIFF kal dante an zir chiang bawk.
Hetihlai hian June 3, 2023 khan AIFF Constitution thar tur chungchang chu Supreme Court-in a ngaihtuah a, he thilah leh Core Committee inhmuh khawmnaah Lalnghinglova Hmar hi a tel a ni.