- Mahmuaka Chhakchhuak
Seiniin Instagram-a kan thil post ve chu mi pahnih/ khatin tlawmngaiin an like emaw chauh a nih laiin thenkhatte chuan like-tu an lo ngah thei hle mai. Like-tu an ngah a ni chang lo a, Insta atang chuan hlawkna nasa tak an lo nei zawkin follower an ngah ang zelin an hlutna pawh alo sang a. Khawvela infiammi huhang ngah tak, kum 1988 Nov. 5-a Punjabi Hindu chhungkua atanga rawn piang chhuak Italian Criket star Virat Kohli chuan Instagram-a company fakna a post atangin Rs. Vbc 3.5 – 5 inkar a beisei nia sawi a ni. Hei hian Kohli thawhpui hlut zia a ti lang a, a bik takin India ram chhungah huhang a ngah em avangin, company liante chuan an thil siam chawilarna atan Kohli hi thawhpui tura an duh ber zingah ala tel reng a. Company hrang hrang; Fire-Bolt, Weel Man, Himalaya, Myntra, Google Duo, Mobile Premier League, Hero MotoCop, Phrama-Volini, Too Yum, Tissot, Audi India leh a dang eng emaw zat chuan Kohli hi an thawhpui mek bawk a ni.
Tumkhat chu Delhi khawpuia Global programme kan hman zawh tawh hnuin kan pastor, Rev. Chawngate Inah ka insawn a, an hnenah chuan ni eng emaw ti chhung ka cheng a. Nikhat chu Rev. Chawnga te nupa nen India Gate tlawhin kan kal a, mi pawh an lo tam hle mai nain a rem dan dan chuan thla kan han lakpui ve nawk nawk a. Chutianga thlalak remna lai leh midang lan tlemna lai kan han zawn kualna lamah chuan kum upa tawh tak ni si a, pumraw te reuhte hi India Gate hma lamah khumparh khum chung hian a lo teikual a. Pumraw te tak a nih vang chuan thla lakpui tumin a kiangah chuan kan han kal a, thlalakpuia ka han sawm chuan Rs. 20/- a ngai a ti ta tlat maiin a thlawn chuan alo remti hauh lo mai. Keipawh chuan a thlawn a a remtih loh chuan tiin ka kalsawn leh mai a, a hnuah erawh thlalakpui man a inchhiar chu awm ka tihpuiin Rs. 20/- pe chuan thla ka lakpui leh ta a, amah lah chuan thlalak chu nuam a ti nge ni zawk alo zei riau mai lehnghal a, a lungawih hmel viau a, keini pawh kan lungawi viau bawk a ni.
Kan kalsawn hnuah chuan ka ngaihtuahnaah a awm zui ta rengin; Thlalakpui vang mai mai a Rs. 20/- pek ngai chu rem a hria ka tiin a hlutna a hre hle mai ka ti a. A san zawng chu 3fts pawh a tlin ka ring kher lo a, a hmai chu a hnawih var vekin tiang a hawl bawk a. Smart taka incheiin lukhum sen a khum a, veng mawng lama Pa Thlana, pumraw lian tak ni chunga inchei ngai reng reng lo ai chuan zahawm tak a ni. Rs. 20/- chu kan tan pawh phawrh mai alo harsa lo bawkin uihawm tham pawh a ni lo a, chutih rualin ama tan erawh alo lawmawm viau thung bawk si a. Chutianga nilenga a awm a, mi sawmngain thla an lakpui chuan Rs. 1,000/- a hlawh mai dawn tihna a ni a, atan chuan ava tha dawn em. Dik tak chuan hnathawk thei pawh a ni kher lo thei a, chutianga sum leh pai zawn mai chu a tihtheih awmchhun pawh a ni mai thei bawk a ni tihte ka ngaihtuah zui reng a, remhria ka tiin a hlutna hre tak chunga a sum lak luh dan chu dik ka tiin ka lawmpui hle mai.
Mitin hian hlutna kan nei theuhin kan hlutna hi kan hre tawk lo ni te hian a hriat zawk. Kan khawtlang nun, a bik takin pipu atanga kan lo chhawm tawh hian chutianga mahni hlutna hre tur pawhin remchanna a siam lo viau pawhin a hriat. Lo tlawmngai teh inti mai thinin an thiam leh an theihna zawnah pawh tlawmngai turin kan inngen chuan tlawmngaih loh theih a ni thin si lo a, sum leh pai lama hlawkna awm lo bawkin kan in then leh mai a. Hei hi a tha lo e chu ka ti hauh lo nain hetiang reng hi chuan mahni hlutna pawh kan hre lo thei mai dawn hian a hriat. Amaherawhchu tunlai chuan tumah kan a duh tawh lo a, sum leh pai emaw thil dangin lawmawm inpek kan ching ta zawk a, a lawmawm viau a ni. Entirna atan Doctor leh Nurse, a bik takin Nurse-te hi thenawm khawvengte hian damloh nikhuain an in lamah kan panin kan ko buai thin. Damlohna thilah chuan anni pawhin tlawmngaih chhuahin an theihna leh thiamna chu an lo hmang ngei tur a ni. Nimahsela chutianga an lo inhuamna chu a pantute chuan a thlawn ngawta tih tir bik loin an remchan ang angin lawmman an pe tur a ni (In lama Nurse-te kohna/ panna hi rate an siamin ka hria). ‘Ka lawm e’ tih leh ngawt thin hi chin fo chi a ni lo a, an rate chu engzat pawh nisela kan remchan ang anga sum leh pai kan pek hi kan tih tur a ni. Anni an lo tlawmngai a, an lo lak duh loh chuan thudang nise.
Damloh nikhua lam ni lo, thil dangah pawh hian tlawmngai turin mi thiamna kan phutin kan beisei fo thin. Kan Electric wire fello a awm a, bulb a eng thei tlat lo mai a, siamtha turin a thiam kan ko a, a siam tha a, ‘ka lawm e’ ti ngawt loin kan remchan dan danin sum leh pai emaw thil dang pawh nisela a siamthat man chu kan pe tur a ni. Amah chu kan ngamtlak leh kan unau em em pawh nisela a thiamna chu kan zahin kan ngaihhlut sak tur a ni a, a thiamna chu a thlawn ngawta hman tir chin loh tur a ni. Chutiangah chuan hmun dangah Rs. 100/-an lo pe thin a ni mai thei a, keini pawh chuan amah kan ngamtlak kan kan thiantha tak tak a nih avangin a thlawn ngawt loin Rs. 50 tal pek chu kan tih tur a ni. A lak duh loh chuan a lak duh lo a ni mai a, a thu a ni. Hetianga man neia thil kan tih a, sum leh pai kan pek hian hlawhfa angin kan chhawr tihna a ni hauh lo a, a tam leh tlem lam chu engpawh nisela, an thiamna chu kan zah a, kan chawimawi sak a ni tih lantirna a ni. Thil dang zawng zawngah pawh a ni vek a, dik tak chuan Gas bur thlak ringawt pawh hi a hoh hmel viau nain thiam loh chuan a buai theih viau a nia.
A thiam zawk leh a hre zawkte ngei pawh hian an thiamna leh hriatna hi a thlawn ngawta an luan chhuah tir fo chuan an hlutna hi a hniam phah thei. A thlawna intihsak/ intanpui hun chu a awm ngei ngei bawk ang a, chutiang veka tih erawh a hun tawh loin engkim hian man a nei tih hi mitinin kan hriat a ngai. Engkim hian man a nei a ni tih hi kan hriat a tha hle a, tunhma zawnga savun kan ei that duh vak loh pawh tunah chuan ei chakawm taka siamin sum chang thei alo ni vek tawh a, tunhmate kha chuan zingkarah a thlawnin lu kan in mehsak mai mai thin kha a ni a, tunah chuan Lumeh man alo awm tawh mai a ni lo a, Rs. 100/- lai a lo ni tawhin thlai chi takngial pawh kan inpek tawh ngai loh hi. Miin thiamna emaw talent a neih pawh kan hlutsak tur a ni a, a thiamna leh a theihna chu kan hmang tangkai duh a nih pawhin a phu tawk lawmman kan siam sak thin tur a ni. Chu chuan zahawmna a keng tel a, in chawimawina a ni tel bawk a ni.