Balasore, Odisha-a rel chetsualna thlengah thi chhungte hnenah state leh sorkar laipuiin zangnadawmna a pek tur a puan chu chan ngei tumin nu pakhatin a pasal a thi tih a report ve a, harsatna a awm phah.
Gitanjali Datta, Maniabanda, Cuttack district chuan a pasal, Bijay Datta chu June 2-a rel chetsualna thlengah hian a thi zingah a tel ve niin a sawi a, a ruang pawh a ni ngei niin a sawi a; mahse, lehkha nena finfiah a nih meuh chuan a dik lo tih hmuh a ni leh ta si a ni.
Police-in a chet dan a dik tawk lo tih hi a pasal ngeiin Maniabandha police station-ah a la thi lo tih a thlen atanga hriat a ni a, thubuai a thehlut a. A nupui hi man hlauvin a biru mek niin police hian an sawi.
Police hian an nupa hi kum 13 zet lo awm hrang tawh niin an sawi bawk.
Bijay-a hian a nupui hlui ni tawh, Gitanjali-i lakah hian hremna na tak pek a phut a, mipui sum lemchanga hman tum chu a dik lo hle tih a sawi.
Maniabanda police station in-charge Basant Kumar Satpathy chuan police hian Gitanjali-i pasal hlui hnenah hian Bahanaga police station, Balasore district-ah thubuai thehlut turin an ti tih a sawi.
Hetih lai hian Chief Secretary PK Jena chuan Railways leh Odisha police hnenah zangnadawmna chan tuma an chhungte ruang ni lo an ruang nia chhal an awm chuan an lakah hremna na tak kalpui turin a ngen mek.
Odisha Chief Minister Naveen Patnaik chuan rel chesuala thi chhungte hnenah hian Rs. Nuai nga an pek tur thu a puang tawh a, Prime Minister Narendra Modi pawhin Rs. Nuai hnih an pek tur thu a puang tawh a. Railway Ministry phei chuan Rs. Nuai 10 zet pek turin a ti.
June 2 zan dar 7:00 vel khan Coromandel Express chuan bungraw phur rel suin a pindan tam zawk a let a. Mi 288 vel thi awmin mi 1,200 chuangin hliam an tuar bawk.
Coromandel Express rel pindan let hian anmahni tawk zawnga tlan, Bengaluru-Howrah Express hnung lam pindan eng emaw zat suin kawng an zawh sual phah bawk a ni.