Venhim hnathawktute chuan Jammu & Kashmir-a Shopian district-ah nimin khan firfiak panga an that.
Police-te chuan beihpui hi sipai leh police tangkawpin zing vartian atanga an thlak a nih thu an sawi a. South Kashmir-a Shopian district, Reban khuaah firfiak an awm tih thu an dawn bawhzuia che an nih thu an sawi a. Inbeihna hi darkar 12 awh niin firfiak tawmte hi an vaiin an that.
Beihpui thlaknaah hian Indian Army, Central Reserve Police Force (CRPF) leh Shopian Police an tel a. Inspector General of Police (Kashmir) Vijay Kumar chuan firfiak 5 an thah thu leh beihpui an thlak chu an tihtawp tawh thu a sawi.
Police-te chuan helho hi mihring chenna in pakhatah an lo tawp tih an sawi a. Defence thupuangtu, Col Rajesh Kalia chuan helho bak mi dang thi emaw, thil tihchhiat emaw a awm lo tih a sawi a. “An awmna lai hi mi dang kal theih loh tura dan pin vek a ni a, nasa taka inkah hnuah an vaiin kah hlum an ni a,” a ti.