China sorkar chuan Japan chu an tualchhung inrelbawlna, a bik takin Hong Kong leh Xinjiang chungchangah inrawlh lo turin a hriattir.
China Foreign Minister Wang Yi chuan Thawhtanni khan Japan Foreign Minister Toshimitsu Motegi chu telephone hmangin darkar 90 chhung a bia a. Beijing lamin an ngen avangin inbiakna hi an nei niin Japan foreign ministry-te’n an tarlang.
Inbiakna an neihchhan hi tun thla tawp lama Japan Prime Minister Yoshihide Suga leh US President Joe Biden-te’n inkawmna neih an tum vang niin a lang.
China FM chuan Motegi hnenah Japan ramin China hmalaknate chu hleih nei lo leh thlir dan dik taka thlir a, China laka hel ramdangte ang maia ralkhat thlir ve lo turin a hriattir.
Motegi chuan China chu East China Sea-a Senkaku thliarkar hnaih tuipuia an ramri chhungah lut tawh lo turin a hriattir a, Xinjiang-a human rights rahbeha awm chu ngiahven a, Hong Kong sorkar inrelbawl dan chungchangte ngaihven turin a hriattir.
Tun thlatawp hian Japan Prime Minister Yoshihide Suga leh US President Biden-te chu China-in human rights an kalpui dan chungchangah inkawmna an nei dawn a. Biden-a’n office a luah hnua hmun leh hmuna ram hruaitu a kawm vawikhatna tur a ni.
Suga hi Washington-a a zin laiin Motegi leh Japan Defence Minister-te chu Germany-ah an kal ve bawk ang. Hei hian Japan ramin Diaoyu thliarkar chu an thuneihna hnuaia awm a ni tih lantirna leh thlawppui turin ram thiltithei an tlawh kual dawn niin thil thlirtuten an sawi.
Thlahmasa khan Japan chuan tuipui bial an inchuhna hmunah thla khat chhungin China coastguard-te’n vawihnih an tlawh thu leh Japan thununna hnuaia awm Senkaku thliarkarah kartin vawi 2 dawn lai an kal thin thu anlo sawi tawh a. Senkaku Island tih hi Chinese tawng chuan Diaoyu tihna a ni.