- Ruata
Maruti Suzuki chuan India ramin a nghahhlelh em em, Jimny 5-door chu an tlangzarh fel ta a. Rs. Nuai 12.74 (ex-showroom) man atangin a intan dawn a ni.
Maruti Suzuki hian Jimny hi an hralhchhuak zui nghal char char dawn a. Maruti Jimny hian mipuiah huhang a nei tha khawp mai a. A finfiahna chu market lama tlangzarh fel a nih hma hauh pawh khan booking 30,000 chuang a awm tawh a ni. India market tana siam bik Jimny SUV hi Gurugram facility-ah siam a ni ang a. He plant vek hian ram pawna thawnchhuah tur pawh a siamchhuak dawn a ni.
Maruti Suzuki chuan K15C petrol engine thar hmang loin 1.5L, 4-cylinder naturally aspirated petrol motor hlui zawk an rawn hman tir a. He khawl hian peak power 105bhp a pe chhuak a, torque 134Nm a pe chhuak bawk. Gearbox duhthlan tur pahnih a awm a, hei hi 5-speed manual leh 4-speed torque converter automatic a ni. A tui heh zawng lamah chuan Maruti Jimny hian manual gearbox-ah petrol litre khatin km 16.94 a tlan thei a, automatic transmission-ah km 16.39 a tlan thei thung a ni.
Tarlan thin tawh angin he SUV hian Suzuki AllGrip Pro 4WD system a nei a, hetah hian manual transfer case leh low range gearbox 2WD-high, 4WD-high leh 4WD-low mode te a awm vek a. Offroad lama tui tan leh kawng chhiaa tlan thin te tan lirthei tha tak a ni dawn a ni.
Maruti Suzuki Jimny khan san zawng, ground clearance hi 210mm a ni a, a turning radius (kual zim theih dan ber) chu 5.7m a ni. Off-road lama a theihna tipungtu chu 3-link rigid axle suspension, electric power steering leh electronic traction control te a ni.
Maruti Jimny tlangzarh thar hian kentel tha tak tak, changkang tak tak, tunkai lirtheiah chuan kan hmuh tam em em mai hi a nei ve deuh vek a. A man to Alpha trim zawkah hian a awm lehzual a. A kentel zingah hian 9 inch touchscreen infotainment wireless Apple CarPlay & Android Auto, 360 degree camera, climate control, reversing camera, keyless entry, cruise control, airbag 6, ABS te a tel EBD, hill hold assist, hill descent control, Isofix child seat mounts, brake limited slip differential, electrically foldable ORVMs, LED headlamp headlamp washer leh thil dang dang a nei a ni.
Maruti Suzuki atanga hman atanga 4×4 offroader kan neih thin lar tak chu Maruti Suzuki Gypsy a ni a. Sorkar in lirthei himna tura khuahkhirhna hrang hrang a duan avang te leh chhan hrang hrang avangin Gypsy chu kan hmu zui ta lo a. Maruti Gypsy hi India ram chuan a duh em em a, a bik takin keini tlangram chhengchhiaa chengte phei chuan Gypsy hi la chhuak se duh ngawih ngawih an la tam viau awm e. Offroad adventure lama tui te pawhin India ramah chuan an lirthei hmuh that leh hman nasat a ni ve bawk a, tuna 4 wheel drive system nena Jimny a lo chhuak ta hi heng mite zawng zawng tan chuan thil lawmawm tak a ni awm e.
Jimny hi khawvel market dangah chuan hun rei tak a lo chhuak tawh a. India ramah pawh a 3-door version ho kha a lo chhuak ve mai dawn a sawi te a awm thin a. Mahse, kan la hmu ngai lemlo a. Tunah hian kawngka 5 nei Jimny chu India ramin a nei ve dawn ta reng mai a. Jimny duh tu, nghak chhuak hleithei thin lo te pawhin tunah chuan an nghak chhuak chiang ta a. India ramah hian leitu an tam viau a beiseiawm a, Mizoramah ngei pawh leitu an tam viau a beiseiawm a ni.