Thla ruk pawh tling lo chhungin India ram venhim hna thawktute chuan Jammu & Kashmir-ah firfiak pawla mi 93 zet an that hman a, heng zingah hian an hruaitu lawk tak tak pawh an tel.
“Nimin tuk thleng khan firfiak 93 zet venhim hna thawktuten Jammu & Kashmir-ah an that tawh a. Ni hnih liam ta chhung mai pawh khan sipai tumah chan lovin Kashmir phaikuamah hian firfiak 9 zet thah an ni,” tiin Army chuan a sawi.
Firfiak pawl leh an hotu lawkte laka beihpui thlak hi ram chhung leh Line of Control hrulah la thlak chhunzawm zel a ni.
Firfiak hotu lawk thah zingah hian Riyaz Naikoo leh Junaid Sehrai pawh an tel a. Anni bakah hian ram dang mi firfiak, Jaish-eMohammed, Lashkar-e-Toiba, leh Pakistan-a indin, The Resistance Front-a mite thah teuh an ni bawk.
Thla hmasaa beihpui an thlaknaah venhim hnathawktute hi che fuh lovin Keran sector-a inbeihnaah Para-military force sipai 5 lai an thi a; mahse, hemi tum pawh hian ramri kâna India-a luh ruk tum firfiak 5 kah hlum tho a ni.
Beihpui thlakna dang, Handwara chhehvela thlaknaah thla hmasa bawk khan Colonel leh Army dang 3 an thi bawk a. “Mahse, tun hnaia beihpui thlaknaah chuan sipai chân an awm tawh lo,” tiin sipaite chuanan sawi.
Kashmir Valley-ah hian inbeihna la awm chho zel tura ngaih a ni a, tun lai hi Pakistan occupied Kashmir-a vur khal a tui hun lai, ramri kân a remchan lai a nih avangin thenawm ram atanga luh ruk tum an awm zel dawn nia ngaih a ni.