Myanmar zaithiam, Lily Naing Kyaw chu sipai lamtang nia hriatten chawlhkar khat liam taa a lua kah a nih hnuah Yangon damdawi inah a thi.
A thihna hian sipai thlawptute chauh a barakhaih lo va, milar tam tak a barakhaih.
Kum 58 mi hi kum 2021-a thuneihna chhuh luitu, sipai hotute nen an inpawh hle a, an hnena thu hrilhtu nia hriat a ni bawk.
A kap hlumtu nia puh mipa pahnih man an ni tawh a. Sipai duh lova hel pawl nia ngaih an ni a. Man an nih hnu lawkah pakhat zawk chhungte pahnih chu thah an ni zui nghe nghe.
Kyaw-i thah hi tun hnaia sipai sorkar thlawptu langsar thah an nih leh hmasak ber a ni.
Beih a nih hma ni li lekah khan nationalist leh sipai thlawptu, Tint Lwin chu Yangon-a thingpui dawr kawtah a lu-ah kah a ni tawh a. Ani hi nikum nipui lai khan kah a ni tawh a, hemi hnuah hian a biru char char.
Kyaw-i hi May 30 zing hma takah, Yangon-a Yankin Township-a an ina a lirthei hunna bulah kah a ni.
Report hmasa lamah chuan thah angin sawi a ni a, a car bawha a awm lai pawh social media-ah a darh nasa hle a. Damdawi inah hruai a ni a, June 6 hma takah khan a thi ta tih a chhungte chuan an sawi.
Sorkarin thuchhuah a siamah ‘pawisawi lo hmeichhia rawng taka thahna’ tiin a tar lang a. Sipai thlawptu pawl 17 zetin thah a nih demna thu an chhuah a. Buddhist pawl kal na tak pawl, Ma Ba Tha chuan venhimna tha zawk an phut bawk.
Mipa pahnih, sipai do pawl, Yangon-a hmunpui nei, Special Task Force an tih member man an ni a. Pakhat zawk, Kaung Zar Ni Hein chu CCTV footage atanga hriat a ni a. Pakhat zawk hi Kyaw Thura a ni a. An chungthu rel nghakin an awm mek a, anmahni an puang tawh niin sipaite chuan an sawi.
Sipaite chuan zirlai hruaitu hriat hlawh tak, D Nyein Lynn chu a phenah a inrawlh niin an sawi.
A thattu nia hriatte man an nih zan hian Kaung Zar Ni Hein nu leh a unau (cousin) chu Yangon-a an inah kah an ni a. A nau mipa leh hmeichhiate erawh an tlanchhuak a, ‘venhimna pek an ni’ tih sipai thlawptu channel chuan a tar lang.
An chhungkaw beitu leh venhimna pe nia sawi hi finfiahna erawh a la awm lo.
Kyaw-i hi sipai chhungkua atanga sei lian niin sorkar thiltihnaah pawh hmuh a ni fo va. A hla zinga pakhat chu tui kût-ah unofficial theme song atan hman a ni hial a, kût hi New Year-ah hman thin a ni.
Kyaw-i hi sipai hnena thu hrilhtu nia ngaih a nih avangin tum bik nia sawi a ni a. An venga sipai duh lohna lantira bel vuak rik huaihawt lai video a tidarh a, man a tawh phah a. Thalaite hnenah hel tura mi fuihtu anga puh a ni thin bawk.
February, 2021-a sipaiten Aung San Suu Kyi-i kaihhruai, National League for Democracy (NLD) rorelna an paih thlak hnuah khan CNN leh Southeast Asia Globe ten Myanmar an tlawh tum khan thu sawi turin Kyaw-i hi tih a ni a. Enthlatu anga an puh thu a sawi a, phatsantu anga an tihna duh lohna chu a in bula thirbanah poster a tar bawk tih a sawi a. A chenna in suasam a ni bawk tih a sawi.
“Sipai hi ka thlawp a, thuneihna an chhuh pawh hi ka thlawp bawk a; mahse, ka thenawma chengte hian NLD thlawpin min thah an duh tih an sawi,” tiin a sawi a. “Heng mite hi ram tihchhiat duhtute an ni,” a ti bawk.
Kyaw-i thah a nih hnuah hian sipai sorkar thlawptu milarte chuan an sipai thlawpna lantir an ti rih dawn lo tih an sawi a. Venhimna an dawng tha lo va, silai kengten an luhchilh thei reng tih an sawi.