Aizawl: MNF President Zoramthanga chuan kum 2023 inthlanpui atana Hachhek biala MNF party candidate tur atan Aizawl East II bialtu MLA ni lai, Robert Romawia Royte ruat a nih thu nimin khan Zawlnuama MNF party-in hun an hmannaah a puang.
MNF Hachhek Joint Block Meet leh mi thar lawmluh inkhawm, Zawlnuama neih hmanpuitu MNF president chuan Nilainia MNF Party Gen. Hqrs. Nomination Committee thukhawmin Hachhek biala MNF party candidate atan Aizawl East II bialtu MLA ni lai, Robert-a ruat a nih thu a sawi a, he thu hi puang tura an tih anga puang chhuak a nih thu a sawi.
Zorama chuan MNF sorkar chu ram hrang hranga awm Zohnahthlakten an thlamuanpui thu a sawi bawk a, “Kan Zohnahthlak unaute hian Pathian tanpuinain MNF a sorkar leh ngei a tul thu an sawi,” a ti.
Khawvelin Mizo hnam a hriatna chu hnam thinlung an put vang a nih thu te, Mizoram chauh ni lo, hmun hrang hranga Zohnahthlakten Mizo nationalism an tuipui thu leh hei hi vawn nun zel a pawimawh thu a sawi bawk a ni.
Zawlnuama MNF Hachhek Joint Block Meet-ah hian MNF President Zorama chuan MNF zawm thar mi 1,391 a lawm lut a, he hun Khualzahawm, MNF Adviser Robert Romawia Royte chuan sorkar hmalaknain Hachhek bial khaw hrang hrangin hmasawnna thar an nei tam hle tih a sawi bawk a ni.