Aizawl: NABARD (RIDF-XXVI) atanga Rs. nuai 267.15 senga sak, Tawipui ‘S’ Primary Health Centre (PHC) building thar chu nimin khan Mizoram Health Minister Dr R. Lalthangliana’n a hawng.
Health minister chuan Tawipui ‘S’ PHC building thar banga chhinchhiahna lungphek phum zar hliahna puanzar pawt hawngin, kawngkharpuia ribbon zam a cheh chah hnuah building chhung lam a fang kual nghal a. Hemi hnu hian Tawipui ‘S’ PHC building thar lawmna inkhawm buatsaih zui a ni.
Minister chuan Tawipui ‘S’ PHC building sak thar tha tak hawn theih a ni ta chu lawmawm a tih thu a sawi a. Uluk taka enkawl zui tur leh damloten tisa leh thlarauva damna an channa hmun a nih theih nana tangkai taka hmang turin thawktute leh khawtlang mipuite chu duhsakna a hlanin, a chah a ni. Sorkar chuan ram mipui hriselna a ngai pawimawh hle tih sawiin, Mizoram hmun hrang hrangah hospital, PHC, Health & Wellness Centre, Sub-Centre, Clinic, office leh thawktu quarters eng emaw zat sak zawh tawh leh sak tura tihfel tawh a awm tih a sawi a. Mizorama sub-centre eng emaw zat chu health & wellness centre-ah hlan kai niin, hriselna kawnga hmasawnna chuan state pum a tuam a ni, a ti.
Minister chuan COVID-19 leng vangin ramin harsatna nasa tak tawk mah ila, ram mipui tanrualna avangin hun khirhkhan kan tawn tlang a, hriselna kawngah COVID laiin khawl leh hmunhma tihchangtlun lamah ramin hmasawnna tam tak a neih phah tih a sawi a. COVID karah Pathianin hna min thawhsak a ni, a ti. Sorkarin theihtawpa hma a lakna azarah World Bank atangin hriselna lama mamawh phuhrukna tur leh tihchangtlunna tur sum Rs. nuai 28,000 hmuh a nih thu sawiin, state sorkarin budget-a sum a dah bak, sorkar laipui atang leh JICA leh ram chhung leh ram pawn agency hrang hrang atangin hmasawnna hna thawhna tur sum eng emaw zat hmuh tawh leh beisei mek a awm bawk tih a sawi a. Hriselna kawnga hma lakna leh sawrkar hma lakna hrang hrangah sum leh thawktu awm mah se, mipui thlawpna leh thawhpuina tel lo chuan hmasawnna leh hlawhtlinna tluantling a awm thei lo tih sawiin, ram mipuite chu sawrkar hma lakna theih tawpa thlawp leh tawiawm thin turin a chah a ni.