Aizawl: Pachhunga University College chuan NIRF Ranking-a India ram pum huapa college tha 34-na a nihna chu nimin khan an seminar hall-ah an lawm a, Larsap Dr Hari Babu Kambhampati chuan a hmanpui.
PUC chuan an college hlawntlinna lawmna pual hian ni hnih awh tur, International Symposium on ‘Sustaining Nature & Tribal Worldview: An ecocritical approach to Literature’ an buatsaih bawk.
Heng hun hmanpuitu larsap chuan PUC hlawhtlinna chu Mizoram tana inchhuanna tham a nih thu sawiin, he dinhmun thleng tura theihtawp chhuahtu zawng zawngte hnenah lawmpuina a hlan a, thil tum chiang taka nei chunga hma lam an pan theih zel phawt chuan hun reilo teah PUC chu India rama college tha filawr a la nih theih a rin thu leh nakin lawkah Deemed University dinhmun pawh an la hlawhchhuah a beiseiawm thu a sawi bawk.
He hunah hian Principal Prof H. Lalthanzara’n inlawmna thu a sawi a, khualzahawm Mizoram University Registrar Prof. Lalnundanga’n thu a sawi bakah Dept. of Physics Head Dr Lalhriatzuala’n NIRF ranking chungchang leh he hlawhtlinna nei tura PUC-in hma a lak dan te report a pe bawk a ni.
National Institutional Ranking Framework (NIRF)-in India rama zirna in sangte that dan a tehna tun hnaia a tihchhuahah PUC chu 34-na a ni a, nikum khan 45-na niin, kuminah hian dinhmun sang zawkah an inhlang kai a ni.
PUC-ah hian Arts, Science, Commerce leh Management stream-ah zirna kalpui mek niin department 23 a awm a, zirlai 3,000 chuang an nei mek a. NAAC-in CGPA of 3.47 out of 4 rating peiin A+ grade college a ni mek.