MNF thalaiin Manipur-a Zohnahthlakten inrelbawlna hran an phut chu MNF party-in a thlawp tih nimin khan Aizawl Press Club-ah an puang a, Mizoram sorkarin Manipur-a Zohnahthlak harsatna tawkte tanpui nan buhfai bag 9,952 a thawn chhuak tawh tih an sawi.
MNF thalai headquarters hruaitute chuan nimin khan chanchinbu mite an kawm a, an vice president, Zodinpuia’n a kaihruai a. Manipur state-a cheng Zofate thil chu an party-in a thlawp tlat thu an sawi rualin Zohnahthlak MLA 10 chu inrelbawlna hran an phutnaah nghet taka ding zel tura an beisei thu leh an kiangah MNF party a ding reng dawn thu an sawi a. Manipur buaina chin fel a nih thuai theih nan inrelbawlna hran pe thuai turin sorkar laipui pawh an beisei tih an sawi
MNF thalai hruaitute chuan Meitei pawl thenkhatin Zohnahthlak unaute hmai tihbalhna tur leh Manipur-a Meitei mipui chet dan tenawm tak hliah khuhna tura National war against Chin-Kuki Narco Terrorist an puang ve ngawt chu nuihzatthlak an tih thu an sawi a, Manipur Zohnahthlak unaute tana Chief Minister Zoramthanga hmalakna ngai thei loa Meitei mi sual thenkhatin a lim an hal chu Mizoram CM ropuizia tar lannaah an ngai tih an sawi bawk.
MNF thalai hruaituten an tar lan danin Manipur state atanga Mizorama tlan lut hi mi 10,091 an tling tawh a, Manipur a Zohnahthlakte harsatna tawkte tanpui tur hian Mizoram sorkar chuan buhfai bag 9,552 a thawn chhuak tawh bawk a ni.
Manipur bakah Myanmar leh Bangladesh atanga Mizorama raltlante tan nghet takin MNF ding reng tih an sawi bawk a. Raltlan chungchang an sawi bakah hian MNF kaihhruai sorkar tluka Mizoram humhalhna kawnga sorkar huaisen an la awm lo tih bakah Zofate inpumkhatna turin MNF sorkarin nasa takin hma a la tih an sawi bawk a ni.