Khawvela football legend Lionel Messi chuan French champion Paris Saint-Germain a contract a hman zawh hunah a khelh lehna tur a tichiang a. Sawmna lian tak tak karah Major League Soccer lamah Inter Miami a zawm dawn.
Kum 35 mi Messi hian Saudi Arabia club Al-Hilal hnen atangin sawmna lian tak a dawng a. Kum khatah Euro maktaduai 400 hlawh tir an huam niin an sawi a, a tawp nan Euro maktaduai 500-ah an san nia sawi thawm a awm bawk.
Amah hian a club hlui Barcelona a kir leh duh mahse Financial Fair Play avangin Barcelona in an lalut thei lo bawk nen, America lamah David Beckham-a team zawm a thlang ta zawk a ni.
“Miami pan hi ka thlang a, Europe chhuahsan ka thlang. European team dang hnen atangin sawmna pawh ka dawng a, mahse kan ngaihtuahnaah pawh ka dah lo. A chhan chu Europe-ah chuan Barcelona-ah bak kal ka duh lo.”
“World Cup chawi hnuah Barca ah ka kir thei dawn lo a nih chuan MLS-ah football zinkawng thar ka zawh hi a hun tawh a ni.” tiin Messi chuan a sawi.
Messi hi MLS chanchin a hlawh hnem ber a ni dawn a, a contract hi puanzar ni lo mahse Apple leh Adidas atangin an sumdawnna kawng atangin hlawkna tel tur a nei ve dawn bawk.