China hmarthlang lama barbecue restaurant-a thil puak avangin mi 31 vel an thi a, mi pakua man an ni bawk.
Nilaini zana Yinchuan khawpuia thil thleng hi boruakalhthei (gas) put vanga thleng a nih rin a ni.
President Xi Jinping chuan chhanchhuah hna thawh leh chhui zuina kawngah ‘a theih ang zawng zawngin an che’ tih a sawi.
Fuyang Barbecue Restaurant neitu pawh man zingah hian a tel niin sorkar chanchinbu chuan a tar lang.
Thil puak hi China-a chawlh an hman thin, ni thum awh tur, Dragon Boat Festival tan hmaa thleng niin hetih lai hi chhungte leh thian thate chawlh hmanga chaw an ei khawm tam lai a ni.
Thi zingah hian high school zirlai leh an hna atanga chawlh tawh (retiree) eng emaw zat an tel niin tual chhung chanchinbute chuan an tar lang.
Hliam tuar mi pasarih vel an awm a, an zinga pakhat chu a na hle nghe nghe a, thi pawh hi an pun a rinawm hle niin Xinhua news agency chuan a tar lang bawk.
President Xi Jinping-a chuan hliam tuarte enkawlna kawngah a tih theih apiang ti tur leh ni dang zela himna tura thil kalpuite khawng leh khauh zawka ti turin a ti.
“Hliam tuar chhanchhuah kawngah leh an chhungte hnem kawngah theihtawp chhuah a ni a, a thlen chhan chhui kawngah pawh tih theih ang ang tih zel a ni a, a mawhphurhtu an awm chuan dan anga an chunga hma lak ve a ni ang,” tiin Xi-a chuan a sawi.
Restaurant hi the Ningxia autonomous region khawpui, Yinchuan chuanhnuai lama thil eina hmun leh hlimhlawh chhuahna hmun bawra awm a ni.
Sorkar hnuaia broadcaster CCTV-in video an tihchhuahah chuan kangthelhtu eng emaw zatin restaurant hma lam atanga mei kang chhuak nasa tak thelh tuma an bei lai a lang a. Khawlaiah darthlalang keh them leh thil dang darh a tam hle bawk.
Fire & rescue services chuan an mi 100 chuang leh lirthei 20 an thawh chhuahpui niin Emergency Management Ministry chuan a sawi a. Chhanchhuah hna hi Ningani zing dar 4:00 thleng thawh a ni.
Fire department-in an chhui tawhna chinah chuan a puah hma darkar khat chuangah restaurant-a thawk pakhat chuan gas put rim a hre tawh niin an sawi.
Liquefied gas tank-a valve chhia pawh an hmu chhuak tawh a, a puah lai vel hian thlak tuma beih lai mek a ni bawk niin tual chhung chanchinbute chuan an sawi bawk.
Barbeque restaurant-te hi China-ah chuan an kawtthlera ei leh in zawrhna hmun langsar niin a bik takin an ram hmarthlang lamah an uar zual hle a ni.