ZPM thalai chuan nimin khan Aizawl South I bial chhunga SASCE hna chhuak chungchangah thil fel lo a awmah ngaiin Mizoram Lokayukta-ah FIR an theh lut.
ZPM thalaiin FIR an theh luhah chuan Aizawl South I bial huam chhungah SASCE hnuaiah hna hlawm hrang hrang pathum a awm a, chung hna zawng zawng sanction amount chu Rs. vaibelchhe 8.11 a ni a, heng hnathawh kalpui danah hian thil fel lo tam tak a awm nia an hriat thu an sawi.
Heng hnaahte hian a project nena inmil lo hna tam tak a awm tih leh a taka hmuh tur awm lo hna sanction a awm nia an hriat thu an tar lang a, chung zinga an hriat theih chu Construstion of Concrete Pavement on College Veng Field to PUC to Bethlehem Vengthlang kawn a ni, tiin, heng hnate hi PWD thawh tura ruahman ni mah se MNF party worker-te induhsakna atan hman nia an hriat thu leh he hi dan bawhchhiatna a nih thu an tar lang.
FIR an theh luhah chuan SASCE chu ram hmasawnna hna rotling tak thawhna tura ruahman a nih laia sum siamna atan mai maia hman nia lang leh, sum hmanna felfai lo awm te chu chhui chhuah an duh thu sawiin, dan bawhchhetu chungah rorelna dik tak lek a nih theihna turin FIR an theh lut ta tih an tarlang bawk.