Gujarat High Court chuan Indian eptu hruaitu, Rahul Gandhi-a’n mi tihhmingchhiat thubuaia hremna an pek tikhawtlai tura a ngenna chu a hnawl.
Gandhi-a hi kum 2019-a inthlan campaign-a thu a sawinaah Prime Minister Narendra Modi-a hnam hming sawi chhia nia puh niin March thla khan kum hnih lung in tang tura hrem a ni.
Hremna pek a nih avang hian MP a nihna atang pawhin paih nghal a ni.
Zirtawpni khan Congress party chuan Gandhi-a hian Supreme Court-ah ngenna a thehlut leh dawn tih an puang.
Gandhi-a hian hremna a tawrh tak tak loh nan dan hmanga a beih theih ang zawng zawnga a beih hun zawng man theih rih loh tura tih a ni.
Zirtawpnia high court thutlukna siam erawh Congress hruaitu tan hian a na hle a, nakum maiah inthlanpui a awm dawn a, a chuh thei lo ang tih a hlauhawm ta hle.
High court hian a ngenna thehluh a hnawlsaknaah hian Gandhi-a hremna pek chu ‘dik leh dan ang thlap’ a nih thu tar lan a ni.
A hnua an party hruaitu, dan hre mi ni bawk, Abhishek Manu Singhvi-a’n thuthar lakhawmtute a kawmnaah thubuai chu ‘duh ang sawi theihna leh awm theihna zalenna chungchang’ a nih thu a sawi.
He thubuai hi rorel lai, BJP mi leh sa thehluh a nih thu a sawi bawk.
“He sorkarin a tum ber chu mahni duh ang zawng tihlan theihna zalenna thunun a ni,” a ti a. “Hei tak hi mi tihhmingchhiatna dan hman sual a nih chhan a ni,” a ti bawk.
Party president Mallikarjun Kharge pawhin Gandhi-a hian ‘dikna tan a bei’ tih a sawi a, a bei zel dawn bawk tih a sawi bawk.
Gandhi-a hi March 23-a court-in thiam loh a chantir tukah parliament member a nihna pawh hlihsak nghal a ni a. A hmain Supreme Court-in dan siamtu zingah kum hnih leh a aia tam lung in tang tura hremte reng reng an nihna hlihsak turin thu a lo titlu tawh a ni.
Congress party chuan Gandhi-a hremna chu nasa taka sawiselin BJP sorkar chuan phuba lakna politics an khel niin an puh a. BJP erawh chuan hei hi phain dan hmanga rorelna chu tih dan pangngai vekin engkim tih a nih zawk thu an sawi.