A thlengtu mipui nghahhlelh inkhel Ningani zanah an khel a. Tualchhung star tan hlawh Andy Murray leh Stefanos Tsitsipas te inkhel chu zawh hman a ni lo.
British star, Wimbledon champion ni tawh Andy Murray hi world number 40 a ni mek a. Kawng hliam avangin a tennis hun a tawp mai dawn nia a lan tawh hnuah lo kir lehin seeded number five nen an inkhel.
6-7 (3-7) 7-6 (7-2) 6-4 in Murray hian hma a hruai hman a, nimahsela inkhelhna hmun local council in zawh hun tur an tihah an zawh hman loh avangin nizan khan an khel chhunzawm leh ang.
Wimbledon-ah hian British Summer Time a zan dar 11 thleng inkhelh theih a ni a, India sana-ah chuan zing dar thum leh a chanve thleng a ni.
Naupang zawk Tsitsipas hi chak tura rinkai zawk a ni a. Nimahsela kum 36 mi Murray-a’n grass court-ah tawnhriat a ngah tawh a chhawr a, set hmasa ber a hloh hnuah set hnuhnung pahnih a la.
Murray leh Tsitsipas te inkhel tur hian ngaihven a hlawh a, court chhunga an record mai bakah court pawn lamah pawh boruak an nei tawh.
Kum 2021 US Open khan inkhel tawhin Tsitsipas-a’n hemi tum hian inthiarna hun ‘bathroom break’ rei tak a neih chu Murray hian a sawisel a. He inkhelah hian set hnuhnung ber hi Tsitsipas hian la in hnehna a chang.
Tun tum Centre Court-a inkhelah erawh boruak dang a tel lo. Inkhel erawh a hmuhnawm viau.
Hetihlai hian fans thenkhatin khel tluan thei nise Murray-a tan chak theihna hun a tha hle niin an ngai.
Inkhel dang
Mipa inkhel dangah champion lai Novak Djokovic leh a elpui hlun thin Stan Wawrinka te an inkhel dawn a, nizan zanlaiah an inkhel ang.
Wawrinka hian Tomas Etcheverry chu 6-3 4-6 6-4 6-2 in a hneh. “Novak nen heta kan inkhel tur hi thil ropui tak a ni. Helai hmunah hian kan la inkhel ngai lovin ka hria. Ka tan chuan amah elpha tawk nih a pawimawh dawn. Tunhnai result kan en chuan kan inkhan lo viau ang.” tiin a hautak tur thu a sawilawk.
Seeded number three Daniil Medvedev chuan 6-3 6-3 6-4 in Adrian Mannarino a hneh a. Anni inkhel pawh hi a tawp lam an zawh hman loh hnuah an chhunzawm a ni.