Russia-a Kazan khawpuia sikula inpawng kahna thlengah naupang eng emaw zat leh zirtirtirtu a thi.
Thi zat hi sawi dan inang lo a awm nuaih a; mahse, thuneitute chuan naupang pasarih vel an thi tih an sawi a. Hliam tuar eng emaw zat damdawi inah lak an ni.
Moscow khawpui atanga khawchhak lam km 820 vela hla, Kazan-a sikula silai hmet puaktu nia puh rawlthar pakhat man a ni a. He khawpuia cheng tam zawk hi Muslim niin Tatarstan ram bial a ni.
Tatarstan President Rustam Minnikhanov chuan he inkahna hi ‘lungchhiatthlak’ a tih thu a sawi.
Russian President Vladimir Putin pawhin an rama silai thununna dan an neih chu ennawn a nih tur thu a sawi nghal.
Silai hmeh puahna hi School No. 175 a ni a, thil a thlen hnuah hian ralthuam nena inthuam police leh rikrum thila chesual lirthei eng emaw zat an thleng nghal.
Social media-a video theh darhah chuan naupang thenkhat chu himna zawngin tukvekah an zuang chhuak a, mi dangte pawh chhuahtir an ni a. Russian TV chuan chhawng hnihna tukverh atanga zuang chhuak naupang pahnih an thi tel niin a sawi.
A tirah chuan silai hmet puaktu hi pahnih nia sawi a ni a, pakhat thah angin an sawi a; mahse, thuneitute chuan pakhat chauh a nih thu an sawi.
Thuneitute hian mi pariat an thi tih an sawi bawk.
Minnikhanov chuan naupang thite hi pawl riat zirlai hmeichhia pathum leh mipa pali an nih thu a sawi a. Zirtirtu a thi tel bawk tih a sawi.
Sikul kawta thuthar lakhawmtuten an kawmnaah naupang 12 leh puitling pali hliam tuarin damdawi inah dah luh an nih thu a sawi.
“Firfiak hi man a ni a, kum 19 a ni a, silai neih phalna nei a ni,” a ti.
Social media-ah pawh rawlthar pakhat, kawtlaia nam beta man lai theh darh a ni.